Løgtingið fer í dag at viðgera uppskotið frá Johan Dahl, landsstýrismanni, um broyting í løgtingslóg um barsilsskipan.
Uppskotið hjá landsstýrismanninum leggur í høvuðsheitum upp til hesar broytingar:
· At leingja tíðarskeiðið, ið foreldur, herundir foreldur at ættleiddum børnum, hava rætt til barsilspening
· At pápin fær rætt til ein størri part av barsilstíðini við barsilspeningi
· At skipanin verður eftirlønargevandi
· At betra um rættindini hjá foreldrum, ið fáa tvíburðar ella fleiri undir sama barnsburði
· At betra um rættindini hjá foreldrum at ov tíðliga føddum børnum
· At veiting fyri inntøkumiss sambært § 17, stk. 3 í forsorgarlógini verður tikin við í
útrokningargrundarlagið.
Sambært løgtingslóg um barskilsskipan hava foreldur í dag rætt til at vera heima í barsilsfarloyvi við barsilspeningi í tilsamans 34 vikur. Rættindini til barsilsfarloyvi við barsilspeningi eru soleiðis sett saman:
- Mamman hevur rætt til barsilsfarloyvi við barsilspeningi í 30 vikur innan fyrstu 30 vikurnar eftir barnsburð.
- Foreldrini kunnu velja, at pápin skal vera í barsilsfarloyvi við barsilspeningi í upp til 16 vikur eftir 14. viku eftir barnsburð. Hetta er tó treytað av, at mamman ikki samstundis er heima við løn frá arbeiðsgevara ella við barsilspeningi frá Barsilsskipanini í tíðarskeiðinum.
- Pápin hevur rætt til barsilsfarloyvi við barsilspeningi í 4 vikur innan fyri tær fyrstu 34 vikurnar eftir barnsburð. Av hesum 4 vikunum kann pápin lata mammuni 2 vikur. Tekur hann ikki hinar báðar vikurnar, detta tær burtur.
– Við hesum uppskoti verður skotið upp at leingja barsilsfarloyvið við barsilspeningi við tilsamans 4 vikum soleiðis, at barsilstíðarskeiðið við barsilspeningi verður tilsamans 38 vikur, sigur Johan Dahl.
Rættindini til barsilsfarloyvi við barsilspeningi eru tá soleiðis sett saman:
- Mamman hevur rætt til barsilsfarloyvi við barsilspeningi í 32 vikur innan fyrstu 38 vikurnar eftir barnsburð.
- Foreldrini kunnu velja, at pápin skal vera í barsilsfarloyvi við barsilspeningi í upp til 18 vikur eftir 14. viku eftir barnsburð. Tó er hetta treytað av, at mamman ikki samstundis er í barsilsfarloyvi við løn frá arbeiðsgevara ella við barsilspeningi frá Barsilsskipanini í tíðarskeiðinum.
- Pápin hevur rætt til barsilsfarloyvi við barsilspeningi í 6 vikur innan fyri tær fyrstu 38 vikurnar eftir barnsburð, harav hann kann taka 2 vikur saman við mammuni, hóast hon samstundis fær løn frá arbeiðsgevara ella útgjald frá Barsilsskipanini. Av teimum 6 vikunum kann pápin lata mammuni 2 vikur.
Tekur hann ikki hinar 4 vikurnar, detta tær burtur.
Uppskotið hjá Johan Dahl kann lesast VIÐ AT TRÝSTA HER
Viðmerkingar til uppskotið kann lesast VIÐ AT TRÝSTA HER
Uppskotið verður til fyrstu viðgerð í Løgtinginum á fundinum í dag klokkan 11. Skráin til tingfundin sær soleiðis út:
1. 1. viðgerð: Løgtingsmál nr. 126/2013: Uppskot til løgtingslóg um broyting í løgtingslóg um barsilsskipan Málið verður beint í Vinnunevndina
2. 1. viðgerð: Løgtingsmál nr. 137/2013: Uppskot til samtyktar um at endurskoða oljuskattalóggávuna Málið verður beint í Vinnunevndina
3. 1. viðgerð: Løgtingsmál nr. 140/2013: Uppskot til samtyktar um at skerpa sjóvegis flutningsskylduna hjá landinum Málið verður beint í Vinnunevndina
4. 1. viðgerð: Løgtingsmál nr. 99/2013: Uppskot til samtyktar um at kannað tørvin á yrkislærdari arbeiðsmegi í framtíðini Málið verður beint í Vinnunevndina
5. 1. viðgerð: Løgtingsmál nr. 110/2013: Uppskot til løgtingslóg um broyting í løgtingslóg um ættleiðingarstuðul – (hækkan av stuðulsveitingini) Málið verður beint í Trivnaðnevndina
6. 1. viðgerð: Løgtingsmál nr. 101/2013: Uppskot til løgtingslóg um Etiskt ráð Málið verður beint í Trivnaðarnevndina
7. 1. viðgerð: Løgtingsmál nr. 104/2013: Uppskot til ríkislógartilmæli um at seta í gildi fyri Føroyar “Anordning om ikrafttræden for Færøerne af lov om psykologer m.v.” Málið verður beint í Trivnaðarnevndina
8. Framløga
