Arbeiðsbólkurin, sum hevur gjørt nýggjan rúsdrekkapolitikk fyri landsstýrið, mælir til, at skeinkistøð skulu verða munandi strangari við fólk, ið hava eru ávirkað av rúsdrekka. Tað skal ikki longur bera til at drekka seg skítfullan í býnum.
Fróði Jacobsen var verkætlanarleiðari í sambandi við arbeiðið, og hann staðfestir, at tað stendur tað í rúsdrekkalógini sum er, at tað er ikki loyvt hjá skeinkistøðum og barrum at skeinkja fyri fullum fólki.
Hann sigur, at arbeiðsbólkurin, sum hevur orðað tann nýggja rúsdrekkapolitikkin, heldur, at meiri eigur at verða gjørt fyri at halda hendan partin av rúsdrekkalógini.
Tað merkir, at tey, sum hava barrir og skeinkistøð, fáa eina størri ábyrgd at ansa eftir, at tað ikki verður skont fyri fólki, sum, eru sjónliga ávirkað.
- Tað kunnu vera nógvir mátar at siga tað upp á, og kynstrið er at duga at siga nei, uttan at tað elvir til rok. Og tað ber til at læra seg nakrar mannagongdir, sum ger tað lættari hjá tí forsmádda barrgestinum at góðtaka eitt nei, uttan at alt ov stóra misnøgd, sigur Fróði Jacobsen.
Endamálið við strangari skeinking er millum annað at minka um harðskapsmál og hendingar, har fólk fáa skaða, tí tey eru so drukkin.
Í býarlívinum í Stockholm hava tey innført hugtakið ”ábyrgdarfull skeinking”, og royndirnar av tí eru góðar. Talið á harðskapsmálum er minkað 29 prosent, síðani átakið var sett í verk.
- Endamálið er at steðga tí ótálmaða drykkjuskapinum, tí tað vísir seg, at tað er, tá ið fólk eru hamrandi skít, at tey koma sær sjálvum og øðrum í trupulleikar, heldur Fróði Jacobsen.
Arbeiðsbólkurin mælir til, at hetta verður sett í gildi longu næsta ár.
Meira kann lesast um málið í Sosialinum í dag.
