Vit eiga at fáa ein fólkaheilsumyndugleika, sum skal ráðgeva myndugleikunum í málum, sum viðvíkja heilsuverkinum. Tað heldur Sirið Stenberg, landsstýriskvinna í heilsumálum.
Kristianna Winther Poulsen, tingkvinna fyri Javnaðarflokkin, hevur spurt hana, hvussu tað gongur við arbeiðnum at samskipa heilsuverkið.
Í hesum sambandi kann nevnast, at bæði læknar, sum heild, og onnur, hava leingi funnist at, at Heilsumálaráðið hevur ongan heilsufakliga myndugleika, sum kann ráðgeva politiska myndugleikanum, og fyrisitingini í sambandi við heilsuverkið.
Tey halda, at hetta ein av stóru trupulleikunum í heilsuverkinum, og tað heldur Sirið Stenberg eisini, at vit eiga at fáa.
– Eitt sera týdningarmikið stig, ið eigur at takast fyri at tryggja okkum eitt gott og tíðarhóskandi heilsuverk í Føroyum, er at fáa ein sterkan fakmyndugleika innan heilsuøkið í Føroyum, sigur hon. Tí arbeiðir hon við eini ætlan um at fáa skipa ein Fólkaheilsumyndugleika.
– Tað er tørvur á einum sterkum fakmyndugleika á heilsuøkinum í Føroyum, ið kann ráðgeva landsstýrinum, kommununum og almennum myndugleikum í heilsuspurningum, sigur landsstýriskvinnan.
Hon sigur, at tískil er ætlanin at skipa ein fólkaheilsumyndugleika, sum skal vera føroyski fakmyndugleikin á heilsuøkinum.
Eftir ætlan skulu Fólkaheilsuráðið og Deildin fyri arbeiðs- og almannaheilsu húsast hjá Fólkaheilsumyndugleikanum. Stovnurin skal hava til uppgávu at veita landsstýrinum, kommunum og almennum myndugleikum, eina holla ráðgeving í heilsufakligum spurningum.
Harumframt er ætlanin at yvirtaka Landslæknan , so hann verður eisini ein av Fólkaheilsumyndugleikanum.
