Mentamálanevndin hjá Tórshavnar býráð hevur samtykt at fara undir at skráseta øll jarðfest krígsminni frá seinna heimsbardaga í kommununi. Samtykt er at seta 100.000 krónur av til endamálið.
Hendan samtykt er gjørd eftir at Mentamálaráðið í 2009 gjørdi av at staðfesta, at krígsminni frá seinna heimsbardaga eru friðað jarðfest fornminni. Avgerðin var grundað á tilmæli frá Fornminnisnevndini.
Hon segði, at neyðugt var at skipa fyri verndartiltøkum fyri krígsminnini, tí tey kámaðust skjótt, og væntast kundi, at áðrenn 100 ár eru liðin, er heildarmyndin mist.
– Nógvar leivdir frá seinna heimsbardaga hava verið í Tórshavnar kommunu, sum var ein miðstøð hjá bretska hersetingarvaldinum, men tær eru nógv fækkaðar, sigur Jógvan Arge, formaður í mentamálanevndini í Havn.
– Tað hevur týdning fyri okkara søgu, at Tórshavnar kommuna hevur skil á hesum fornminnum, og til tess betri at lúka setningin um, at krígsminni frá seinna heimsbardaga verða vard, er samtykt, at Tórshavnar kommuna fyri sítt viðkomandi ger eina dygga skráseting av øllum slíkum jarðfestum fornminnum, sigur Jógvan Arge.
Skrásetingin verður framd eftir altjóða skrásetingarháttinum SAVE, sum fyrstu ferð varð nýttur, tá Tórshavnar býaratlas varð gjørt fyri fáum árum síðani.
Friðingin hjá Mentamálaráðnum merkir, at fornminni frá seinna heimsbardaga skulu í framtíðini hava frið. Byggiætlan, sum kann hava við sær avleiðingar fyri eitt slíkt fornminni, skal framman undan góðkennast av fornminnamyndugleikunum.
Orsøkin at kunngerðin kom, var, at fólk hildu, at gingið var í so nær leivdunum frá seinna heimsbardaga, og varð ikki friðing sett í verk, so vóru hesi søguligu krígsminni skjótt burtur.
