Norðlýsið, sum verður stýrt av formanninum í Norðoya Sambandsfelag, hevur funnið fram, at Sveinur Tróndarson, sum kom við søguni um Jørgen Niclasen og tollin á Portalinum stutt fyri jól, fyrr hevur starvast hjá Landsgrannskoðaranum.
Hin kopiportalurin, Vágaportalurin, er sjálvandi altíð skjótur, tá tað ræður um at verja Jørgen Niclasen – ímóti hvørjum tað skal vera.
Hevði tað verið søgan um, at vit nú hava ein »whistleblowara« – ein sangfugl, sum royndi at avdúka slíkt, sum verður sópað undir teppið í ymsum almennum stovnum, so var tað áhugavert.
Men uha! Hví er tað so áhugavert, um Sveinur hevur starvast hjá Landsgrannskoðaranum, ella um hann hevur brotið onkra tagnarskyldu?
Snýr tað seg ikki bara um at skjóta journalistin? At leggja út eitt roykslør?
Um Jørgen er so ósekur, sum hann sigur, so er tað lættasta ting í verðini at prógva tað. Vit halda, at hann bara skuldi gjørt sum Løkke: Kallað pressuna á fund og lagt alt á borðið!
