Tveir sigrar í tíggju royndum. Tað var fasittið hjá KÍ á heimavølli undan næstsíðsta vikuskifti, tá ið tað framvegis luktaði av niðurflyting í Klaksvík.
Í tíggju teimum fyrstu royndunum í landskappingini á heimavølli í ár megnaði KÍ at skora ellivu mál, og úrtøkan var sjey stig – sigrar á B68 og ÍF og javnleikur ímóti HB.
Tølini tala, og hesa síðstu vikuna siga tey, at tað eru komnir heilt aðrir bollar á suppuna hjá sigursvanda felagnum. Eftir eyðmýkjandi tap á heimavølli ímóti eitt nú 07 Vestur og B71, sum hava kós ímóti næstbestu deildini, hevur KÍ reist seg úr øskuni sum fuglurin Føniks.
Í tveimum dystum í seks dagar hava klaksvíkingar vunnið seks stig og harvið flutt seg burtur frá niðurflytingini. 5-1 ímóti NSÍ og 5-3 ímóti B68.
Og hesi bæði avrikini hava borið íblástur, sjálvsálit og fagna millum áskoðararnar við sær. Unga liðið hevur ímóti teimum báðum liðunum av Skálafjøðrinum skorað tíggju mál, og hóast klaksvíkingar í verjuni vóru fittir og blíðir ímóti toftamonnum, so er tað eingin ivi um, at ein ikki so lítil partur av stóru fjøldini, sum í góða veðrinum leygarkvøldið vóru festligur karmur um hendingarríku uppgerðina, fara at koma aftur.
Kanska ikki allir, tí tað var tunnilsdagur leygardagin, og tí vóru heilt nógv KÍ viðhaldsfólk, sum búgva í høvuðsstaðnum og aðra staðni, í Klaksvík. Men undirhaldið og úrslitið bera við sær, at áhugin fyri KÍ av álvara er kyknaður.
Eisini tí tað kennist vera perspektiv í bláa liðnum, sum hevur rist hóttanina av niðurflyting av sær, og nú kann brynja seg til næsta kappingarár, tá ið ambitiónirnar og málið heilt víst verður at røkka hægri enn so.
Avrikið leygarkvøldið vísti, at tað næsta ár væl ber til at ímynda sær álopsspæl, sum kann bera úrtøku til altjóða luttøku við sær. Konseptið er agressivitetur frammarlaga á vøllinum, tá ið mótstøðuliðið hevur fingið fatur á vøllinum.
Álvur F. Christiansen mennist við risa fetum, Kristoffur Jakobsen hevur eftir aldudal funnið sjálvsálitið og máltevið aftur, Hjalgrím Elttør heldur framvegis støðið, og Nenad Stankovic tykist eisini at vera komin fyri seg aftur.
– Móti B36 og EB/Streymi her í Klaksvík vóru vit rættuliga verjukendir. Ímóti NSÍ og B68 hava vit lopið á, og tað hevur riggað væl. Hóast góðu gongdina, so hugsa vit fyrst og fremst at halda tørn um plássið í deildini. Alt annað síggja vit sum eykavinning, segði Álvur F. Christiansen eftir dystarlok.
Treiskir toftamenn
Eftir at KÍ var komið framum við tveimum málum var tað ongantíð ivi um, at øll stigini fóru at vera eftir í Klaksvík.
Fyritreytirnar hjá B68 vóru einki serligar. Fleiri av bestu málskjúttunum og framrættaða skjútsinum higartil í ár vóru ikki í ferðalagnum til Klaksvíkar. Hóast henda veruleikan, so megnaði B68 at vera við til at syrgja fyri undirhaldinum. At toftamenn skoraðu trý mál, sigur frá, at teir hava gott tak á álopssælinum, skipað av liðformanninum Jann Inga Petersen og Ndende, men tað sigur eisini, at unga KÍ liðið framvegis hevur nógv at læra í verjuspælinum.
Tí tað er einki at taka seg aftur í, at ein ikki so lítil partur av teimum átta málunum, sum áskoðararnir fingu í leygarkvølds undirhaldinum, spurdust burtur úr persónligum mistøkum. Bæði frammanfyri Gunnar á Steig í KÍ málinum, og Tórð Thomsen í B68 málinum.
– Vit spældu ímóti einum góðum liði, men vit geva teimum fleiri av málunum, og so verður tað tungt. At vit skoraðu trý mál í Klaksvík átti at verið nóg mikið, men tað sigur nakað um verjuavrikið hjá okkum, at tað ikki var nóg mikið hesa ferð, staðfesti André Olsen hjá B68.
Ein partur av setninginum hjá ábyrgdarmonnunum í báðum legunum verður at skipa verjuspælið betri. KÍ venjarin, Aleksander Djordjevic, er farin undir ta royndina. Við at flyta markanta Høgna Madsen aftur í miðverjuna, hevur hann býtt royndu kreftirnar betri millum keturnar, enn tær higartil hava verið.
Nú er tað ilt at ímynda sær annað, enn at bæði KÍ og B68 næsta ár fara at spæla í bestu deildini, og hjá toftamonnum er spurningurin, um eyðsýndi Christian Stokholm framvegis verður í miðverjuni, ella um hon skal skipast heilt av nýggjum.
Men tá snýr tað seg um framtíðina. Í dag kunnu øll tey, sum leygarkvøldið vóru í Klaksvík, skriva undir uppá, at klaksvíkingar rættuliga eru farnir at skjóta við skørpum, eftir at tað leingi hevur verið lítið krút í teimum!
