Útoyggjar: - Másin er eitt gott skip, men er ikki hóskandi til krøvini í dag. Tað hevði ikki verið verri við einum nýggjum skipi, sigur stýrimaðurin umborð á Másanum, Sigvard Johannesen.
Sosialurin hitti hann ein vakran septemberdag í Fugloyarfirði, tá Másin hevði lagt enn ein túr frá landi av Hvannasundi fyri at røkja ferðasambandið hjá fugloyingum og svínoyingum.
Víst varð í greinini á, at hóast Másin er eitt gott skip í sjónum, er tað als ikki dagført til krøvini í dag, millum annað tí at hann gongur so seint.
Serliga á vetrartíð veit manningin at siga frá nógvum ringum túrum um Fugloyarfjørð, har tað hevur brotið í bæði borð, um ein so kann siga.
Sigvard er ikki einsamallur í hesi støðutakan síni og ynskjum sínum: Oyggjarfólkið ynskir somuleiðis eitt meiri hóskandi far til hesa siglingina. Og nú fáa tey so eisini stuðul frá teirra felagi – Útoyggjafelagnum.
Á fundinum fríggjadagin varð tí staðfest, at nógvir av trupulleikunum hjá útoyggjunum botna í vantandi undirtøku frá politiskari síðu.
- Orsøkin til hetta er hin einfalda, at innlitið og forstáilsið ikki er nóg stórt. Tí kann tað bara vera ein fyrimunur, at útoyggjarnar nú hava fingið eina talskvinnu inni í skipanini, ið kann tosa sakina hjá okkum, sigur felagið og vísir til nýggju løgtingskvinnuna, Olgu Biskopstø, sum hevur verið skrivari í felagnum.
Tann nýggja menningarætlanin og ætlanir um fleiri tiltøk á útoyggj eru viðurskifti sum hava stóran áhuga hjá felagnum.
Nýggj skip
Á fundinum fríggjadagin varð gjørdur ein listi yvir átrokandi mál, sum ynski eru um at fáa framd tey komandi árini.
Millum hesi evnini var útbyggingin av infrakervinum, sum skal gerast í eini greiðari raðfesting bæði á sjógvi og landi.
Nógv verður tosað um nýggjar tunlar og havnir, men fyri felagið hevur tað alstóran týdning at viðurskiftini innan samferðsluna á útoyggjunum ikki verða gloymd.
- Mest átrokandi er at fáa nýggj og hóskandi skip til Fugloyar og Svínoyarleiðina, Mykinesleiðina og Skúvoyarleiðina, staðfestir felagið.
Víst verður samstundis á tað neyðuga í, at Hestleiðin skal dagførast við fleiri túrum um dagin, eins og kannast skal nær tey nýggju skipini til Kalsoyar- og Nólsoyarleiðirnar gerast veruleiki.
Eitt annað mál, sum varð tikið fram var tørvurin á at fáa ein veg oman á lendingina í Mykinesi, nýggja havn í Skúvoy og at gera eina nýggja atløgu í Koltri.
Hestur má við
Nógva tosið um undirsjóvartunlar millum oyggjarnar hevur eisini stóran áhuga í Útoyggjafelagnum – serliga tann nógv umtalaði Sandoyartunnilin.
- Vit eru av teirri greiðu fatan, at Hestur skal knýtast upp í henda tunnilin, hóast hetta kemur at seinka ætlanini nakað, sigur felagið.
Eitt annað mál á sama borði er uppskotið um ein slíkan tunnil til Svínoyar – og møguliga eisini til Fugloyar.
Felagið sigur, at eru hetta ætlanir ið kunnu gjøgnumførast, eigur ein at arbeiða víðari við hesum.
- Men, sigur felagið. – Hetta skal tó ikki verða nýtt sum undanførsla fyri at ábøtur ikki verða gjørdar her og nú á hesi farleiðini, sigur umboðsráðið í Útoyggjafelagnum.
citat 1
“Nógvir av trupulleikunum hjá útoyggjunum botna í vantandi undirtøku frá politiskari síðu. Orsøkin til hetta er hin einfalda, at innlitið og forstáilsið ikki er nóg stórt
(Útoyggjafelagið)
