Forsetavitjan
Gøta:
Tá vitjan Ólaf Ragnar Grímsson í Runavík var av fyrrapartin í gjár, fylgdi Rodmundur Nielsen, borgarstjóri, honum til kommunumarkið á Gøtueiði, har borgarstjórin í Gøtu, Halldóra Ranghamar, tók við og fylgdi forsetanum víðari í bussinum til Norðagøtu.
Í Norðagøtu varð vitjað í gomlu kirkjuni og gingið í sporum Gøtu Tróndar, og síðani varð farið í nýggju kirkjuna við Gøtugjógv, har Atli Hansen, kirkjuráðsformaður, greiddi frá kirkjuni og sangkórið Gøta-Leirvík sang gamla Kingo lagið »Nú rennur sólin frí« og íslendska sangin »Smávinir Fagrir«.
