Nýggju lógirnar, sum vórðu samtyktar á aðalfundinum í vár, hava gjørt tað munandi truplari hjá nevndini í FSF at leggja seg beinleiðis í mál, sum hava við kappingar at gera. Eitt nú mál, har atburður hjá spælarum og/ella venjarum skulu viðgerast.
Tað er nevnliga Aganevndin, sum burturav tekur sær av slíkum málum nú. Vil aðalnevndin hjá FSF hava ávíst mál viðgjørt, skal áheitan sendast til Aganevndina, sum so kann taka málið upp. Tað vil við øðrum orðum siga, at hóast aðalnevndin hjá Fótbóltssambandinum metir mál vera revsivert, so er tað ikki víst, at hetta fær nakrar fylgjur yvirhøvur.
Undan hesi lógarbroytingini kundi Kappingarnevndin av sínum eintingum taka mál upp til viðgerðar. Hetta hevur áður verið gjørt. Eitt nú tá nevndin nýtti sjónbandaprógv til at sekta Berg Midjord hjá B36 og Jón Johannesen hjá TB eftir ein tilburð á Sevmýru fyri tveimum árum síðani. Og tá nevndin í fjør valdi at geva B36-venjaranum, Sigfríði Clementsen, dystarbann, fyri atburð sín mótvegis dómaranum í dysti móti HB í fjør. Hetta seinasta varð gjørt, hóast dómarafrágreiðingin als ikki umrøddi hendingina.
