Kringvarp Føroya bar í gjár søguna um, at Kommunulæknafelagið metir, at nýggjar leiðreglur frá leiðsluni á Landssjúkrahúsinum, gera tað verri at staðfesta bróstkrabba í góðari tíð. Kommunulæknafelagið vil hava nýggju leiðreglurnar settar úr gildi.
Marius Dam, formaður í Kommunulæknafelagnum, sigur, at nýggju leiðreglurnar gera greitt, at ein kvinna má vera sjúk fyri at sleppa til mammografi, meðan fyrr var nokk at hava grundaðan illgruna um tað.
Les eisini Kanna møguleikan at veita mammografiscreening
Leiðslan á Landssjúkrahúsinum hevur gjørt av, at mammografikanningar einans skulu gerast, tá tað er ein manifestur kliniskur illgruni, ella við øðrum orðum, einans um kommunulæknin merkir ein knykil í bróstunum á kvinnuni.
Kommunulæknarnir óttast, at nýggju leiðreglurnar kunnu vera ein forðan fyri, at tilburðir av bróstkrabba verða staðfestir, so tíðliga sum gjørligt.
- Tað er ikki altíð so lætt at staðfesta við eini vanligari kanning, um hetta er góðartað ella óndartað og tí ynskja vit, at man hevur ein lágan terskil fyri at senda kvinnur til mammografikanning, og ikki at man hevur ein høgan terskil fyri at sleppa framat, segði Marius Dam við Kringvarpið í gjár.
Landssjúkrahúsið óttast, at mammografikanningarnar verða nýttar sum eitt slag av almennari screening, og boða tí í nýggju leiðreglunum frá, at mammografikanningar einans skulu nýtast, tá talan er um manifestan kliniskan illgruna um bróstkrabba.
Kommunulæknafelagið hevur heitt á Landssjúkrahúsið at strika nýggju leiðreglurnar, og heldur gera sum í grannalondum okkara og geva kvinnunum eitt alment tilboð um screening.
- Hetta verður gjørt í grannalondum okkara og hevur gjørt, at talið av deyðsføllum orsaka av bróstkrabba eru minkað. Vit fara tí at heita á leiðsluna á Landssjúkrahúsinum um at umskipa arbeiði, soleiðis at tað ber til at bjóða øllum kvinnum til regluliga mammografikanning, sigur kommunulæknafelagið.
