Skemtingarsami sjónleikarin á trúnini

10 dagar fyri íslendska komm­unuvalið í 2010 fer ein skari av uppreistrarfólki skrál­andi eftir Laugavegi í Reykjavík. Hýrurin er góð­ur í kalda lotinum. Við skelt­um, ljósarreyðum ballón­um, rópum og sangi hava 50 mælskir ís­lend­ingar kring­sett gongu­gøt­una. Teir gera grúiliga um seg. Ýlini taka ikki at dragna. Stríðs­sang­urin er ein íslendsk útgáva av “Simply the Best,” sum ameri­kanska Tina Turn­er sang so meistarliga í 90-árunum.
Oddmaðurin í fylkingini er 42 ára gamli Jón Gnarr Kristinsson. Hann er gitin sum sjónleikari, skemtari, punk­tónleikari og høvundur. Hann hevur nú gjørt eitt skarvslop inn á politiska pallin. Hann bjóðar seg fram á kommunuvalinum tann 29. mai. Veljarakanningar vísa, at satiriski mótmælisflokkur hansara Besti Flokkurinn stendur til at vinna valið í Reykjavík. Tað er álvari í hótt­anini, hóast tað er lítil álvari í vallyftunum.
Gnarr ger brádliga eitt hvølt ýl í stóru manna­múgv­uni.
– Vit vilja gera alt fyri øll! Vit vilja hava eina hvíta­bjørn í dýragarðin! Vit vilja lurta meira eftir konu­fólk­un­um og teimum gomlu! Vit vilja, at Reykjavík fær eitt Disneyland! Vit vilja hava ókeypis handkløð í svimji­høllu­num! Vit vilja hava eitt rús­frítt Alting í 2020!, róp­­ar skemtarin og sipar til virðisgrundarlag hjá flokk­in­um.

Búskaparkreppan herjar
Íslendska samfelagið ak á knø­unum um hetta mundi. Íslendingar kendu sviðan av úrslitinum, tá samhaldsfestið verður slept upp á fjall, tí villir solospælarar fáa frítt at fara við hjálp frá tillagaðum lógum og almennum skip­an­um. Spekulatión og løtu­vinn­ingar vunnu frama í polit­isku skipanini. Nú var ballið liðugt. Búskaparliga skrældið var veruleiki. Ótamda liberal­isman fór út av eggini. Lands­kassin var skral­l­tómur, og sakleysir borgarar sótu eftir við rokningini. Kreppan var fullkomin. Álitið á politisku skipanina var horvið. Armóð og vónloysi settu sín greiða dám á gerandisdagin.
Tað var í kjalarvørrinum av hesum, at Besti Flokkurinn, uttan nakað boð um loysn­ir, bjóðaði seg fram til komm­unuvalið í 2010. Speirekandi fylkingin hjá Jón Gnarr fekk undirtøku beinanvegin, hóast stóra ivamálið, um flokkurin yvirhøvur hevði áhuga at sleppa framat valdinum.
Rokaligi Jón Knarr bleiv landskendur í Íslandi í níti­árunum. Hann var nógv um­hildin sum skemtari. Stóra frambrotið sum sjónleikari kom við filmunum The Ice­landic Dream og A Man like Me. Hann hevur seinni roynt seg sum handritahøvund til filmar, har hann hevur lut­tikið sjálvur sum sjónleikari. 45 ára gamli Jón Knarr hevur seinastu 15 árini verið millum kringastu sjónleikararnar í Íslandi.
Við skemtiligum orðavali slóð hann fast í miðlunum í valstríðnum, at hetta var álvari.
– Vit rópa okkum fyri Besti Flokkurinn. Hví skuldu vit rópt okkum Besti Flokk­urinn, um vit ikki vóru tann besti flokkurin? Vóru vit ikki tað, so høvdu vit helst marknaðarført okkum, sum tann vánaligi flokkurin, førdi Jón Gnarr fram.

Gay Pride
Tað er fríggjadagurin 6. august 2010. Tað eru gott og væl tveir mánaðir síð­an, at Besti Flokkurinn skúgv­aði hinar politisku mót­støðu­flokkarnar til viks á komm­unu­valinum. Heili 35 pro­sent av atkvøðunum fullu Jon Gnarr og hinum skemt­ar­unum í lut. Eitt greitt dømi um, hvussu misnøgd ís­­lend­­ingarar vóru við valds­­harrarnar, sum høvdu rátt fyri borgum seinastu áríni. Besti Flokkurinn skip­aði skjótt samgongu við Sam­f­ylk­ingina. Henda góð­veð­urs­­­dagin í Reykjavík eru 12 litríkir lastbilar mið­punktið í stórari paradu, sum fer spaku­­liga eftir gongu­gøt­un­um í íslendska høvuðs­stað­­­num. Fremstur stendur borgar­stjórin í konufólka­klæð­um og veittrar til stóru fjøldina, umleið 65.000 fólk í alt.
Borgarstjórin er Jón Gnarr, sum roynir av øllum alvi at bresta vindeyguni upp og skotra rotið burtur úr politisku skipanini. Aðalmálið er at fáa samband aftur við borgararnar, og fremst av øllum at skapa bjartskygni og álit millum fólkini og valdsharrarnar. Undirhald er eitt av vápunum.
– Borgarstjórin fekk tí­verri ikki komið í dag. Hann er upptikin, segði Jón Gnarr í setanarøðuni við kventra­sligari damurødd.
– Hatta er tað, tit fáa, tá tit atkvøða fyri slíkum klovn­um og lata teir sleppa framat valdinum, skoytti hann uppí.
Tað eru ikki øll sum halda, at framferðin hjá borgar­stjóranum er sømilig. At­finn­ingarnar hava verið, at Jón Gnarr vísir ikki virð­ing fyri embætinum – ein borg­­arstjóri skal hava størri tign enn at ganga í konu­fólka­klæðum, hevur verið sagt. Tað broytir kortini ikki, at skemtiligi sjónleikarin er væl umtóktur.

Tosar sama mál
Gaman er nú álvari. Jón Gnarr og Besti Flokkurinn hava lagt seg vinstru fyri miðjuna og hava arbeitt miðvíst fyri at styrkja umstøðurnar hjá familjunum. Eitt av upp­skotu­num er at fáa ókeypis – sum kortini verður goldin við skattapengum – busskoyring í íslendska høvuðsstaðnum.
– Avbjóðingin er at taka hond um tað, sum tekur seg upp. Vit royna altíð at finna loysnir, sum tænir fólkinum best, ber Jón Gnarr fram í viðtalu við enska Huffington Post tann 21. februar í ár.
Ein av styrkjunum hjá borgarstjóranum í Reykjavík er, at hann er fólksligur. Hóast tað hevur gingið við rúkandi ferð, hevur hann ikki mist fótafestið. Gnarr hevur ásannað, at hann umboðar sínar borgarar og ger nógv fyri at tosa sama mál sum veljararnir, ið hava góðan tokka til hansara.
– Eg torgaði ikki politikk sum yngri. Politikkur var torrskiltur, strævin og keði­ligur. Tað vóru fá, sum fataðu, hvat hesi fólkini førdu fram. ‘Hetta er vaksamannaprát, alt fer at laga seg,’ varð svarið, tá eg spurdi meg fyri. Men alt lagaði seg ikki. Samskifti millum valdsharrar og velj­ararnar skal vera lætt at skilja, og tað havi eg lagt doyðin á. Allastaðni í heim­inum samskifta fólk, so hin skilur, hvat tú sigur, sigur Jón Gnarr í samrøðuni við Huffington Post.

Eg eri sum tey samkyndu
Tað er fríggjadagurin 27. juli. Í strembanini at skapa rúm fyri øllum, og at munur skal ikki gerast á borgarum, stendur Jón Gnarr nú á pall­inum til tiltakið hjá LGBT Føroyar. Borgarstjórin hevur heldur ongantíð ivast í at víst teimum samkyndu í Ís­landi sín fulla stuðul. Borg­arstjórin er altíð við til til­tøkinum, sum íslendska LGBT hevur skipað fyri. Nú er hann í Føroyum.
Hóast skemtiligu røðuna, so var álvari í politikkinum. Men tað er eisini rúm fyri skemti í politikki, heldur hann.
– Skemt er sum at vera samkyndur. Tað er ein partur av mær, og eg fari ongantíð at broyta tað. Eg fari altíð at skemta og undirhalda, men undirhald er eisini álv­ari, og sjálvandi taki eg starvið sum borgarstjóri í størst­um álvara, sigur hann við Huffington Post.
Jón Gnarr hevur tvey ár eftir sum borgarstjóri. Tað verður kanska næstu 24 mán­aðirnar, at ein hvítabjørn kemur í dýragarðin í Reykja­vík.

.....
UM JÓN GNARR:

Jón Knarr Kristinsson varð føddur 2. januar 1967. Hann varð doyptur Jón Gunnar Kristinsson, men broytti millumnavnið í 2005. Hann er giftur Jóhannu Jóhannsdóttir. Saman eiga tey ein son.
Jón Knarr var rokaligur sum smádrongur. Hann var millum annað undir viðgerð fyri ADHD.
Hann fekk ongantíð hægri útbúgving. Hann royndi nakrar ferðir, men gavst og fór í starv sum hýruvognsførari og hjá Volvo í Íslandi.
Gjøgnumbrotið sum sjónleikari kom í nítiárunum og hevur verið sera virkin í sjónleikaravinnuni.
Í 2009 tók hann stig til Besti Flokkurinn, sum er ein satiriskur mótmælisflokkur. Nú er hann borgarstjóri í Reykjavík.