Tað gongur væl við skattainntøkunum í Nes kommunu. Í 2016 var fyribilsskattainntøkan í Nes kommunu 39,7 miljónir krónur, sum er 3,8 miljónir krónur meira enn í 2015.
Hetta svarar til ein vøkstur á 10,7 prosent, og tað merkir samstundis, at skattainntøkan ongantíð áður hevur verið so høg í Nes kommunu.
- Í desember 2016 var fyribilsskattainntøkan hjá Nes kommunu, sambært uppgerð hjá Taks, 3,8 miljónir krónur móti 3,5 miljónum í desember árið fyri. Hetta er ein vøkstur á 9,1 prosent.
Í Nes kommunu siga tey, at desember 2016 soleiðis var besti mánaði í skatti hjá kommununi nakrantíð.
Í fíggjarætlanini fyri 2016 varð roknað við einari skattainntøku á 35,0 miljónir krónur, men nú vísir fyribilsskattainntøkan fyri 2016, at skatturin er 4,7 miljónir krónur hægri, og hetta svarar til 13,5 prosent.
Skattaprosentið í Nes kommunu er 20,5. Tað hevur verið óbroytt síðan 2006.
