Listamaðurin Pól Skarðenni er millum annað kendur fyri sítt arbeiði við at byggja upp landsløg í djóragørðum uttanlanda. Við síðuna av hesum arbeiði hevur listamaðurin eisini alla tíðina arbeitt við myndlist, bæði oljumálingum, akvarellum og tekningum.
Hóast myndevnini framvegis spretta úr føroysku náttúruni, er tað ein heldur øðrvísi síða av listini hjá Skarðenni, fólk fáa at síggja á framsýningini í Norðoya Kunningarstovu. Sum heild eru myndirnar meir abstraktar uttan at tað tó ber til at læsa listamannin fastan í hesum stíleyðkenni.
Framsýningin á Norðoya Kunnungarstovu letur upp leygardagin kl 14 og er opin hendan dagin til kl 18. Sunnudagin 12. februar er eisini opið frá 14 til 17. Annars eru málingarnir at síggja í vanligari upplatingartíð fram til 10. mars. Onkrir av málningunum eru longu at síggja á heimasíðuni www.skardenni.dk.
