Síðani summarsteðgin hevur tað gingið av skriðuni hjá Skála. Undan grannauppgerðini í kvøld hevði Skála tapt allar tríggjar dystirnar síðani summarsteðgin, og aftur í kvøld endaði tað við tapi, tá ið Skála spældi grannauppgerð á útivølli ímóti teimum næstbestu hjá NSÍ.
Hetta var triði landskappingardysturin millum Skála og næstbesta liðið hjá NSÍ, og hetta var triðja ferðin, at NSÍ vann við einum máli.
Einasta málið í góðveðrinum við Løkina í kvøld varð skorað tríggjar minuttir eftir steðgin. Málskjutti var Jørgen Nielsen, og Marjus Nón átti uppleggið.
Tølini siga, at Skála hevði seks stórar málmøguleikar, og at NSÍ hevði ein stóran málmøguleika. Eftir at NSÍ hevði skorað, vóru skálamenn fýra ferðir í heilt góðum støðum at skora, men tað eydnaðist ikki at fáa bóltin framvið Dániali Danielsen í NSÍ málinum.
Hóast sera soltnu úrtøkuna síðani summarsteðgin er Skála framvegis greitt oddalið. Skála hevur 37 stig, meðan NSÍ er næstfremst við 32 stigum og Víkingur og B71 hava 29 stig.
