Í løgtinginum eru tað fleiri politikarar, sum vilja hava tað kravda kringvarpsgjaldið avtikið. Tað staðfesti Bjørn Kalsø, landsstýrismaður í mentamálum, á kjakfundi hjá Tjóðveldi í Miðlahúsinum í kvøld, har støðan hjá fjølmiðlunum var til viðgerar.
Privatu fjølmiðlarnir eru fíggjarliga kroystir og á fundinum varð umrøtt, hvussu vit kunnu tryggja føroyingum eitt fjølbroytt úrval av fjølmiðlum í framtíðini, tí mett verður, at tað hevur avgerðandi týdning fyri at tryggja eitt sterkt fólkaræðið og fyri almenna kjakið.
Les eisini: Privatir fjølmiðlar bjargast við almennum stuðuli
Men samstundis vóru tey flestu á fundinum samd um, at tað somuleiðis er neyðugt at hava eitt sterkt, alment kringvarp. Men Bjørn Kalsø staðfesti, at hetta eru verri enn so allir politikarar samdir í. - Tað eru fleiri løgtingslimir, sum eru sinnaðir til at avtaka tað kravda kringvarpsgjaldið, sigur Bjørn Kalsø.
Ístaðin vilja teir hava, at tað skal vera sjálvboðið at rinda kringvarpsgjald, har fólk sjálvi gera av um tey vilja rinda fyri at síggja kringvarpið, ella ikki.
Tey tingfólk, sum vilja avtaka tað kravda kringvarpsgjaldið, halda, at Kringvarpið skal skipast á sama hátt sum Televarpið, ella parabolin, har tú kanskt keypa eitt kort, sum tú setir í ein móttakara, og sum síðani gevur tær atgongd til at síggja Kringvarpið, sigur Bjørn Kalsø.
|
