Peningurin, sum kemur inn til Skótahjálpina, fer vanliga til eina føroyska og eina útlendska verkætlan.
Í ár er tað sjálvhjálparbólkarnir fyri børn og ung í Føroyum, sum hava mist foreldur við deyða, ið fær pengar frá Skótahjálpini.
Tann útlendska verkætlanin er arbeiðið hjá einum kolumbianskum biskuppi, ið eitur Tito Jesus Mora Esquerra. Hann hevur stovnað barnaheim í Kolumbia fyri børn hjá familjum, sum ofta eru flýdd frá lítla garði sínum, tí narkoharkalið hava tikin hann til sína óhugnaligu framleiðslu. Mangan er talan um einligar mammur við stórum barnaflokki, tí pápin er myrdur.
Endamálið við Skótahjálpini er, at frísk og røsk børn ella ung kunnu verða við til at hjálpa øðrum menniskjum bæði í heimlandi og útlandi, sum av eini ella aðrari orsøk ikki hava tað so gott.
Eisini ber til at stuðla Skótahjálpini peningaliga beinleiðis á eina av teirra kontum í peningastovnunum.
Hetta er 21. árið, at tær fýra skótasamskipanirnar í felag skipa fyri Skótahjálpini.
