Í summar fer skúlaskipið Dragin at gera fastar túrar við fólki úr Klaksvík og norð undir bjørgini. Leiðin gongur norður undir stórslignu fuglabjørgini á Kalsoynni og Nakkin á Kunoynni. Av og á verður eisini siglt til Enniberg á Viðoynni, men tann túrurin er longri, greiðir Hans Eli Hansen frá, sum saman við Norðoya Kunningarstovu skipar fyri túrunum.
Vanliga virkar Dragin sum skúlaskip hjá næmingum í fólkaskúlanum, sum hava sjóvinnu sum vallærugrein. Tá fer undirvísingin fram umborð, og er bæði bóklig og verklig.
Fastu túrarnir úr Klaksvíkini vera týs- og fríggjadag kl. 18, um nokk av fólki hava bílagt pláss. Tað skulu vera minst 10 fólk við hvørja ferð. Túrurin er um tríggjar til fýra tímar, greiðir Hans Eli Hansen frá.
Hesir summartúrarnir við skúlaskipinum byrja tó ikki fyrr enn fyrst í juni mánað tá næmingarnir, sum vanliga brúka skipið, ganga til próvtøku. Siglingin heldur tó á fram alla summarfrítíðina.
Ein túrur við Draganum kostar 500 krónur og skal bíleggjast á Norðoya Kunningarstovu.
