Skála og Strendur eru um veturin hondbóltsbygdir. Tær standa saman um 1. deildarliðini hjá St.ÍF - bæði hjá monnum og kvinnum. Um sumrarnar ganga tey heilt nógv uppí kappróður. Tey á Skála hjálpa viðhvørt strandingum at manna Stráluna, og strandingar hjálpa onkuntíð skálafólki at manna skálabátin og Svan.
Fótbóltinum hevur tað verið eitt sindur linligt við nú í nøkur ár, men tíðliga í ár settu teir sær fyri, at nú skudu teir bera bestir og harvið flyta uppaftur úr 3. deild, har teir hava verið nú í fimm ár. Artur Johansen, sum um vetrarnar er ein av stuðulsspælarunum hjá St.ÍF, hevur tikið sær av venjingini. Teir hava vant tvær og tríggjar ferðir um vikuna, sum er væl meiri, enn teir flestu á hinum liðunum í 3. deild gera, og tað hevur gingið sum eftir ánni í kappingini. So væl hevur skorist, at teir longu sunnudagin - fimm umfør undan kappingarenda - staðfestu, at teir hava vunnið kappingina í 3. deild í ár, og at Skála í 1999 fer at luttaka í 2. deild, har teir síðst vóru í 1993.
Tá FS Vágar kom at vitja, var áskoðarafjøldin uppaftur størri, enn hon plagar at vera, og sjálvt um tað gekk eitt sindur striltið, so eydnaðist tað at fáa uppflytingina til høldar.
Spurningurin um næstfremsta plássið og harvið møguleikan at spæla um uppflyting er ikki avgreiddur. GÍ er við í kappingini um næstfremsta plássið, men hjá teimum ber ikki til at flyta upp, tí teir hava lið í 2. deild, og tað er eingin vandi fyri, at GÍ liðið í 2. deild skal flyta niður. Teir eru í løtuni á triðja plássi. Hini liðini, sum kappast um næstfremsta plássið í 3. deild, eru VB og B68, men tað er tætt, og onnur kunnu eisini koma upp á tal. Kortini er ivasamt, um hesi liðini hava styrki til at vinna uppflytingardystir móti t.d. EB/Streymi, sum í løtuni er næstaftast í 2. deild.
B68-B36 5-1 (2-0)
Tað var eingin ivi um, hvat var tað betra liðið. B68 var omaná, og eftir at ein av gestunum miðskeiðis í 1. hálvleiki, tá tað stóð 1-0, varð rikin av vølli, tí hann hevði havnt seg, var tað bara ein spurningur, hvussu stórur sigurin hjá B68 fór at vera.
Álopsmenninir, Aksel Højgaard og Oddmar Andreasen skoraðu ávikavíst miðskeiðis í og fram móti endanum á fyrra umfarinum. Uppspælið gekk fyri seg í høgru síðu.
Í 2. hálvleiki køvdi hann av í mjørka. Kanska mistu B36 menninir veteranin Aksel Højgaard burtur, men Aksel misti ikki málið burtur. Hann skoraði eftir 49 og 50 minuttir. Russarin Serghéy Kréksjin, sum ikki kom inn í 1. deild, økti tá 66 minuttir vóru farnir. B36 fekk sítt mál, tá tað restaðu átta minuttir.
Skála-FS 2-1 (1-1)
Venn, sum eru betri fyri nú, enn teir vóru fyrr á sumrinum, vóru ikki komnir ála at geva stigini burtur. Teir stríddust væl, og teir á heimaliðnum samstundis tóktust darvaðir av nervum, gjørdist tað spennandi.
Eitt korter var farið, tá Kaysten Rasmussen sendi hornaspark úr høgru og beinleiðis í málið. 32 minuttir vóru farnir, tá FSV javnaði. Robert Bernhardsson var hægstur og stútaði frísparksinnlegg úr høgru í kassan.
Tað restaðu tríggir minuttir, tá uppflytingin kom til høldar. Keysten Rasmussen fór til baklinjuna í vinstru, Harald Poulsen í FSV málinum hálvbjargaði fyrstu royndini aftaná innleggið, men tað var løtt søk hjá Paula Hansen við handara stólpan at stýra returinum inn um strikuna.
ÍF-B71 4-1 (1-0)
Heimaliðið hevði meiri spæl og fleiri møguleikar men tað restaðu bara tíggju minuttir, tá tað gjørdist greitt, at teir fóru at fáa full úrtøku.
Jón Magnussen setti hol á við brotssparkið, tá 18 minuttir vóru farnir og 58 minuttir vóru farnir, tá Hallur Sólsker, eftir langan bólt fram, fekk fótað framvið málverjanum, Atla Ryggshamar.
B71 hevði síðani møguleika at leggja seg á odda, men teir misnýttu brotsspark, og so setti Jákup Baldvinsson ferð á. Hann skoraði eftir 75 og 80 minuttir, eftir at hann var vorðin leysur í brotsteiginum. Verjuspælarnir Sigfríður Abrahamsen setti seymin í. Hann sneiddi framvið tveimum, spældi eitt tvey, sneiddi aftur ein av og skoraði. Tað var vorðið sum mál!
KÍ-GÍ 3-2 (2-0)
Um talan er um bjargingarroynd, sum teir í Klaksvík eru farnir undir, fer tíðin at vísa. Hesa ferð hava teir onkrar spælarar við, sum ikki hava verið at sæð í summar, og sigurin ger, at stigini tvífaldaðust.
Men so skal leggjast afturat, at gøtumenn høvdu ikki serliga gott lið. Undan fráferðini leygardagin vóru boð komin frá ferðalagnum, sum var á veg heim úr Ungarn, um at goyma fólk til sunnudagin, tá bæði 1. og 2. deild skuldu til Klaksvíkar.
KÍ var á odda 2-0, tá tað var hálvleikt. Marni Isaksen setti hol á úr spískum og Hans Marner Christiansen økti. GÍ ætlaði sær at koma aftur íaftur, tá John Petersen hevði skorað, men við beinleiðis frísparki sløkti Pætur við Keldu vónina, og so kom GÍ ikki nærri enn 2-0.
HB-VB 3-1 (0-1)
Tað átti næstan ikki at verið loyvt, helt onkur fyri, tá tað vísti seg, at John Heri Dam og Andrew av Fløtum, sum eru fastir fúsir á komandi FM liðnum hjá HB, spældu í 3. deild.
Men tað vóru vágbingar, sum tíðliga settu hol á. Vongverjin í høgru, Hans Jákup Hjelm, skoraði, áðrenn havnarmenninir høvdu funnið út av, hvør skuldi hava ábyrgdina av hvørjum.
VB hevði møguleikar eisini í 2. hálvleiki, men tá fekk heimaliðið málini, tey bæði fyrru komu tíðliga, og hitt síðsta, tá tað restaði eitt korter. Regni Reinert javnaði eftir uppspæl frá John Hera Dam, sum legði HB framum við langskoti. Gunnar Mohr staðfesti, tá hann slapp frá verjuspælaranum Hans Mikael í Lágabø.
