Tí ítróttarfeløgini meina als einki við tað. Í Havn hava vit tvey stór professiónell fótbóltsfeløg, sum brúka milliónir at keypa fótbóltsspælarar fyri. Men tá tey tosa um sunnar kostvanar, so er tað ein býur í Kina.
Tí í staðin fyri at viðra kostárið og vísa, at tey veruliga meina nakað um sunnar heilsuvanar og sunnan kost, so skála tey beinleiðis við og fyri fótbtóltinum. Tey eggja sínum viðhaldsfólki at drekka eina skál saman við fótbóltinum. Tey hava opna barr í felagshúsinum, og so lýsa tey við rúsdrekka á búnunum hjá bestu fótbóltsleikarunum.
Altso halló B36 og HB! Skulu fyrimyndirnar hjá lítlum HB’arum og B36’arum vera menn, sum renna runt á vøllinum og drekka øl? Man má spyrja, um nakar er heima hjá oddafólkunum í hesum stóru ítróttarfeløgunum. Meðan leikararnir á vøllinum eru rennandi rúsdrekkareklamur, viðhaldsfólkið gongur við góðum gearara rundan um vøllin, og dunsturin av øli og snapsi stendur úr felagshølinum, har hundraðtals børn hava sína dagligu gongd.
Á heimasíðuni hjá ÍSF stendur tað so pent, sum ítrótta- og ungdómsráðgevin hjá ÍSF, Annika H. Lindenskov, sigur:
» – Tað hevur ómetaliga stóran týdning, at fyrimyndirnar hjá teimum ungu geva tey røttu signalini. Fáa vit úrvalsítróttafólk okkara – spælararnar í teimum bestu deildunum – at skilja fult út hvussu týdningarmikið tað er, at tey framtraðka sum fyrimyndir, er nógv vunnið.«
Tá ÍSF kortini einki meinar við hatta sunna, so droppa tað og sigið sum føroyameistararnir vilja hava okkum at siga: Skál fyri ítróttinum og skít verður við heilsuni!
