ÍF-B36 3-2 (0-2)
Tað mundu ikki vera tey nógvu, sum væntaðu, at ÍF skuldi gera nakað sum helst við B36, tá liðini bæði hittust í Fuglafirði sunnudagin.Fuglfirðingar noyddust í fjør tungu leiðina úr fyrstu niður í aðru deild, og harumframt hevði liðið eisini mist fleiri av teimum leikarum, sum tá stríddust fyri at halda liðnum í bestu deildini.
B36 hevur hinvegin talst millum fremstu liðini í Føroyum seinastu 3-4 árini, og hóast frágongdin hevur verið stór í vetur, so hevur hugsanin hjá viðhaldsfólkunum helst verið tann, at tilgongdin eisini hevur verið góð, og at hetta saman við egnari framleiðslu skuldi tryggja, at liðið fór at vera eins væl fyri hetta kappingarárið.
Gekk sum væntað
Sum so mundi gongdin í fyrra hálvleiki eisini vera á eini leið fyri havnarliðið. Vakra fótbóltsspælið, sum liðið hevur sýnt seinnu árini kom ongantíð til sjóndar, men meira týdningarmikið var kanska, at toppskjúttin seinastu tvey árini, Jákup á Borg, sýndi, at hann als ikki troyttur av at skjóta mál enn.
Við stuttum millumbilum skeyt hann tvey mál miðskeiðis í fyrra hálvleiki. Fyrru ferðini fekk hann tó meira enn góða hjálp frá fuglfirðingum. Verjuleikari var í so óansin, tá hann legði aftur til málverjan, og í staðin fekk bólturin beina kós móti málinum, og eftir at málverjin akkurát fekk hondina á bóltin, støkk hesin út aftur til Jákup, og so var 1-0.
Lítla løtu seinni var aftur galið. ÍF misti bóltin á veg í álop, og tá bólturin var stungin inn um verjuna, sum tá var púra fløt, kundi Jákup enn einaferð seta kós móti málinum, soleiðis at støðan nú var 2-0 til B36.
Løtu seinni var so líkt til, at dysturin væl og virðiliga var taptur hjá fuglfirðingunum, tá Rúni Petersen fekk seinna gula kortið og harvið reytt.
Fuglfirðingar vóru tó alt annað enn nøgdir við dómin frá Oddmari, tá hesin metti at Rúni hevði roynt at spælt sjónleik í kriminella teiginum, fyri á tann hátt at dyrgja eftir einum brotssparki.
Mótmælini hjá ÍF leikarunum bøttu tó lítið, og við 11 móti 10 var líkt til, at B36 longu hevði tryggjað sær sigurin.
Kendu seg ov tryggar
Helst hildu havnarmenninir eisini sjálvir, at so var, og tað var kanska høvuðsorsøkin til, at seinni hálvleikur gekk, sum hann gekk.
B36, sum nú var uttan smáskadda John Petersen (skiftur út fyri at hvíla eymu lørini) gjørdi so at siga einki um seg, seinastu trý korterini. Miðvøllurin var so at siga ikki við í spælinum, tí roynt var fyri tað mesta við longum sendingum, og hetta gjørdi eisini at undirmannaði miðvøllurin hjá ÍF fekk góðar sømdir.
Rættuliga tíðliga fekk ÍF minkað um munin, tá Bárður á Lakjuni í tveimum atsóknum fekk sent skot móti málinum. Bólturin hevði beina kós upp í málhornið, uttan at Tróndur Vatnhamar hevði nakran møguleika at verja fyri skotinum.
Tá umleið eitt korter var farið, var aftur galið. ÍF leikararnir vunnu bóltin á miðjum vølli, og Eyðolvur Petersen var sendur avstað í høgra borði. Hann megnaði eisini at renna undan B36 verjuni, og sera hegnisliga kipti hann bóltin upp um Trónd og inn í málið.
Løtu seinni kundi støðan verið 3-2 til heimaliðið, men B36 slapp við hvøkkinum, tá heilfluktari varð sendur dygst fram við stongini. So væl sluppu teir ikki, tá hálvleikurin var um at verða hálvrunnin. Bárður fekk fatur á eini tvørsending á miðjuni, og setti beina kós móti málinum. Staddur nakað uttan fyri brotsteigin sendi hann eitt flat skot móti málinum, og bólturin smoygdi sær inn um handara stólpa.
Bólturin er rundur
Sostatt gjørdist endaliga støðan 3-2 til ÍF, og hesin sigur var ikki eitt mál ov lítið. Tað stutta av tí langa er, at B36 leikararnir vórðu revsaðir, tí teir ikki tóku uppgávuna í nóg stórum álvara, meðan ÍF leikararnir fingu løn fyri stríðið. Teir stríddust í samfullar 90 minuttir, og hóast teir vóru undirmannaðir meira enn helmingin av dystinum, so góvust teir ongantíð á hondum.
Komandi vikuskifti skal B36 á heimavølli spæla botnuppgerð móti B71, meðan ÍF á heimavølli skal dystast um fyribils rættin til fyrsta plássið móti B68, og helst vóru tað ikki mong, sum høvdu væntað at so skuldi verða.
Jú, fótbólturin er eins rundur í ár,sum hann altíð hevur borð orð fyri at vera.
ÍF-B36 3-2 (0-2)
0-1 Jákup á Borg
0-2 Jákup á Borg
1-2 Bárður á Lakjuni
2-2 Eyðolvur Petersen
3-2 Báður á Lakjuni
Dómari: Oddmar Andreasen
