Heimsmeistararnir úr Spania megnaðu púra óvæntað ikki at spæla seg víðari úr bólkaspælinum og eru harvið úti av HM. Hetta er greitt eftir at teir í kvøld taptu 2-0 ímóti Kili.
Tað gjørdist skjótt greitt, at Spania als ikki fekk loyvi at spæla sítt eyðkenda spæl vegna ógvuliga ágangandi spæl hjá Kili. Kviku leikararnir hjá Kili lúrdu í mótálopunum, og tá ið 20 minuttir vóru farnir legði Eduardo Vargas Kili á odda eftir eitt skjótt og væl spælt álop.
Stutt fyri hálvleik var aftur galið hjá Spania. Iker Casillas bjargaði frísparksroynd fyri føturnir á Charles Aranguiz, sum sparkaði bóltin í mál til óvæntaðu hálvleiksstøðuna, sum var 2-0 til Kili.
Í seinna hálvleiki var eyðsæddur fjáltur á sponsku leikarunum, sum ikki fingu frið frá ágangandi kilenskum leikarum. Sergio Busquets hevði ein risa møguleika at minka um munin tíðliga í sienna hálvleiki, men hann misnýtti á skammiligasta hátt og var hetta í grundini ein góð mynd av endaspælinum hjá Spania.
Við 2-0-tapinum í kvøld er Spania úti av HM við eyðmýkjandi málúrtøku upp á 1-7 eftir fyrstu tveir dystirnar. Hetta er fyrstu ferð í HM-søguni, at verandi heimsmeistarin tapir tveir teir fyrstu dystirnar í HM-endaspælinum eftir.
Tað er nú greitt, at Holland og Kili hava spælt seg víðari úr bólki B. Tey bæði liðini hittast í síðsta bólkadystinum – ein dystur um at vinna seg víðari sum 1-ari. Dysturin ímillum Spania og Avstralia er ein týdningsleysur dystur um hvør skal gerast nr. 3 og 4.
Spania – Kili 0-2 (0-2)
0-1: Eduardo Vargas, 20.
0-2: Charles Aranguiz, 43.
Spania: Iker Casillas - Cesar Azpilicueta, Sergio Ramos, Javi Martinez, Jordi Alba, Sergio Busquets, Andres Iniesta, Xabi Alonso (46. Koke) David Silva, Diego Costa (64. Fernando Torres) Pedro (76. Santi Cazorla)
Kili: Claudio Bravo - Eugenio Mena, Mauricio Isla, Gary Medel, Gonzalo Jara, Charles Aránguiz (64. Felipe Gutierrez) Arturo Vidal (88. Carlos Carmona) Francisco Silva, Marcelo Díaz, Eduardo Vargas (85. Jorge Valdivia) Alexis Sánchez
Dómari: Mark W. Geiger (USA)
