Men Karsten Hansen man vera vorðin í ørviti. Í valstríðnum helt hann, at hann enn var tjóðveldismaður. Hann sat undir liðini á Jenisi á Rana í Kringvarpinum og tosaði um, at allur blokkurin skuldi burtur, samstundis sum Jenis av Rana segði, at danir skulu rinda okkum 54 milliardir – altso 54.000 milliónir krónur – aftur í blokkstuðuli.
Og nú gud hjálpi okkum, nú hann er vorðin heilsumálaráðharri í sambandsstýrinum, so sigur hann, at hann vildi ynskt, at allur blokkstuðulin varð burtur longu í 1998.
Tað hevði merkt, at vit høvdu havt tikið 10 milliardir meira úr búskapinum. Tað eru »bara« tiknar 3,3 milliardir úr búskapinum, uttan at nakað er komið í staðin. Tað er hetta, sum sambandsstýrið hjá Karsten Hansen & Co hevur ásannað, og tí ætlar sær biddaragongd til Danmarkar at bidda blokk.
So tá Karsten Hansen er vorðin svorin sambandsmaður, og tá Jenis av Rana er størsti verji kapitalistanna – sum traðkar á tey á niðastu rókunum – so má sigast, at vent er í holuni hjá Miðflokkinum.
– Vit hava eitt uppskot, nú miðfloksmenn eru so umvendir, at teir venda á ranguni:
Miðflokkurin hevur fyrr skipað fyri politiskum skeiðum. Hvat við at Miðflokkurin skipaði fyri einum innanfloksskeiði undir heitinum »Finn teg sjálvan«?
