Sjómenn og ALS-útgjald

Eitt av evnunum í Degi og Viku hósdagin 22. desember 2005 var stovnsetan av ein­um nýggjum gerðarrætti í Føroyum. Upp í hetta evni var ALS og útgjald til fiski­menn tenkt saman. Umrøðan av hesum evni var eintáttað og mundi geva síggjarunum eina mynd, sum ikki er í samsvari við veruleikan.
Formaðurin í Skipara- og Navigatørfelagnum, Ellintur Abrahamsen, greiddi frá, at teirra felag saman við Fiskimannafelagnum m. a. hava sum treyt, at fasti gerðarrætturin ikki verður góðtikin, uttan at ALS-lóg­in verður broytt soleiðis, at fiskimenn fáa úr skipanini á jøvnum føti við aðrar.
Tað er ikki sørt ørkymlandi, at SVF ikki lat umboð fyri ALS koma til orðanna við eini viðmerking.
Tí tað vóru skeivleikar, sum krevja ráttleiðingar.

Øll við A-inntøku rinda ALS-gjald
Øll, sum eru millum 16 og 67 ár, og sum hava A-inntøku og fulla skattskyldu í Føroyum, rinda ALS-gjald. Ávísar veitingar, pensjónir og avmarkað skattskyldug undir FAS eru tó untikin. Hetta er ásett í ALS-lógini, ið er løgtingslóg nr. 113 frá 13. juni 1997. Tað vil siga, at sjómenn, sum hava Ainntøku, rinda ALS-gjald eins og øll onnur í Føroyum.

Sjómenn fáa útgjald úr ALS á jøvnum føti við onnur
Hagtøl fyri november mán­að vísa, at tað eru 974 ar­beiðs­leys í Føroyum. Nevnast skal sum dømi at 180 persónar eru skrásettir í skipanini, sum hava arbeiðsroyndir og/ella arbeiðsynski sum dekkari.
Sambært ALS-lógini fáa sjómenn útgjald úr ALS á jøvnum føti við onnur, tá hes­ir gerast arbeiðsleysir, um vanligu treytirnar fyri út­gjaldi eru loknar.

Føroya Fiskimannafelag hevur ynski um eina serliga skipan fyri fiskimenn
Formaðurin í Føroya Fiski­mannafelag Óli Jacobsen hev­ur arbeitt við einum upp­skoti um at gera eina serliga skipan fyri fiskimenn, so­leiðis at hesir kunnu koma und­ir ALS, tá skip teirra liggur, hóast fiskimennirnir ikki eru uppsagdir. Meiriluti var ikki fyri hesum uppskoti í nevndini, ið gjørdi álit um broytingar í ALS-lógini, sum Landsstýrismaðurin í Vinnumálum setti í februar 2003. Álitið varð handað landsstýrismanninum í febr­u­ar mánaði 2005. Hetta merkir tó ikki, at sjómenn ikki fáa útgjald úr ALS, tí tað fáa teir, um teir gerast arbeiðsleysir.

Misvísandi tíðinda­flutningur
Tíðindini í Degi og Viku um, at ALS ikki rindar út til fiskimenn, eru misvísandi. Fiskimenn, sum verða rakt­ir av arbeiðsloysi, fáa ar­beiðs­loysisstuðul, júst sum tað arbeiðandi fólkið á landi.