Nú skal tað bera til hjá sjófólki og fakfeløgum at klaga skipara og reiðara fyri Sjóvinnustýrinum, uttan at nakar fær at vita, hvør tað er, sum hevur klagað.
Tað skal nevniliga bera til hjá sjófólki at vera dulnevnd, um so er, at tey klaga til Sjóvinnustýrið um viðurskifti, sum ikki eru ílagi.
Tað ætlar Johan Dahl, landsstýrismaður í vinnumálum.
Tí ætlar hann at seta eina nýggja kunngerð í gildi um hesi viðurskifti og hon skal koma í gildi tann 20. august.
Í hesum sambandi verður hugsað um, at sjófólk og fakfeløg skulu kunna klaga fyri Sjóvinnustýrinum um arbeiðs- og liviumstøðunum umborð á skipi, uttan at Sjóvinnustýrið hevur loyvi til at upplýsa, hvør tað er, sum hevur klagað.
- Førir klagan við sær, at Sjóvinnustýrið fer á eftirlitsvitjan umborð á eitt skip, hava umboðini fyri Sjóvinnustýrið ikki loyvi at upplýsa fyri reiðara, ella nøkrum øðrum, sum umboðar reiðaran, hvør av manningini tað er, ella hvat fakfelag tað er, sum hevur klagað, sigur Johan Dahl í viðmerking til kunngerðina, hann ætlar at seta í gildi.
Myndin er tilvildarlig
