Óluva i Gong, forkvinna, Felagið Føroyskir Sjúkrarøktarfrøðingar
---
Felagið Føroyskir Sjúkrarøktarfrøðingar vil átala at manglandi játtan til eldraøkið skal ganga útyvir starvsfólkini. Eisini vilja vit vísa á at øll skerjing av starvsfólkum sjálvsagt rakar búðfólkini á stovnunum.Tað ber sjálvandi til hjá starvsfólkunum at taka ein spurt inn ímillum, men eingin orkar at renna alla tíðina.
Avleiðinganar av skerjingunum eru, sum leiðarar innan eldraøkið longu hava gjørt vart við, at bæði røktin og dagligdagurin hjá tí einstaka búfólkinum verður ávirkaður.
Tá arbeiðstíðin verður skerd verður tað minni uppsýn av dementum. Sum aftur førir til ótryggleika og búðfólk kunnu gerast meira ágangandi og reikandi.
Tað fer at verða longri bíðitíð til grunnleggjandi uppgávur so sum matarstøður og vesivitjan. Tað merkir á vanligum mannamáli, at búðfólkini ikki sleppa á ves, tá tey vilja á ves, men ístaðin tá røktarstarvsfólkini hava tíð at hjálpa teimum. Tað sama er galdandi við mati, tey fáa at eta, tá røktarstarvsfólkini hava tíð at geva teimum at eta.
Tað eru nú knapppir tveir mánaðir síðani leiðarar innan eldraøkið boðaðu frá, at herviligar sparingar skuldu gerast innan eldraøkið. Gongdin síðani hevur verið lítið klæðilig fyri eitt samfelag sum okkara.
Tað er ikki heilt frítt, at ein situr við einum beiskum smakki í munninum yvir framferðarháttin hjá almennaverkinum. Fyrst kunngera tey, at tað er neyðugt at fremja stórar sparingar innan eldraøkið. Vanligi føroyingurin, starvsfólk innan økið og avvarandi at búðfólkum á eldra/sambýlum vóru skelkað yvir tær útmeldingar, sum komu yvir hvørjar avleiðingar sparingarnar fóru at fáa.
Undirskriftir vóru samlaðar og handaðar einari hart sperdari landsstýriskvinnuni í Almannamála- ráðnum, har hon lovaði, at hon fór at gera sítt til at sleppast kundi undan ætlaðu sparingum. Eisini gjørdi hon greitt, at sparingarnar ikki skuldu ávirka røktina. Seinni sama dag fór hon í løgtingið við umbøn um eykajáttan til eldraøkið. Eitt tað síðsta løgtingið gjørdi, áðrenn tað fór í summarfrí var at játta 4.1 mio til - ja til hvat? Tað var jú greitt frá byrjanin av, at játtanin ikki var nøktandi og at umfatandi sparingar skulu gerast kortini.
Aftaná at eykajáttanin er komin brúkra Almannaverkið knappan mánaða at finna fram til ein býtislykil av játtani.
Í ein knappan mánað verða búðfólk, starvsfólk og avvarandi hildin í óvissu um hvussu játtanin skal býtast. Ein knappur mánaði við ótryggleika fyri hvat framtíðin fer at bjóða. Eg undrist yvir hví at vit sum samfelag halda at vit kunnu loyva okkum hesa atferð. Ein knappan mánað har búðfólk á røktarheimum kunnu ivast í hvussu teirra dagligdagur fer at verða. Ein knappan mánað har starvsfólk ikki vita um tey fara at hava arbeiði framyvir. Ein knappan mánað har avvarandi kunnu ganga í angist fyri hvat framtíðin fer at bjóða okkara eldru minnisveikum borgarum.
Nei hetta er sanniliga lítið klæðiligt fyri okkum sum samfelag.
Tá úrsliti endiliga fyriliggur er svarið, at starvsfólkini mugu renna skjótari. Heilt erligt, skal hetta takast í álvara?
