Salt og sjógvur
Seinastu 10 árini er methøgt saltinnihald mált í sjónum, sum streymar úr Atlantshavinum og inn í Norðurhøv og Arktis. Hesir streymar eru høvuðslið í tí heimsfevnandi rákinum, sum rópt verður tað "thermohalina-rákið".
Hitin og saltinnihaldið í sjónum kring Føroyar og inni á landgrunninum er eisini vaksið nógv síðan 1995.
- Í árunum 2002-2004 var sjógvurin heitari, enn hann áður er máldur síðan regluligar hitamátingar byrjaðu í 1914. Sama gongd er eisini at síggja í hita og saltinnihaldi kring Ísland og úr Írlandi upp til Svalbards, sigur Fiskirannsóknarstovan.
Sjógvurin, sum rekur fram við Føroyum, kemur úr økinum vestanfyri Írland.
- Hita-og saltbroytingar hava avleiðingar við sær fyri vistskipanina í sjónum og møguliga eisini fyri rákið á heimshøvum.
Fiskirannsóknarstovan heldur, at hitaøkingin síðan 1995 longu hevur ávirkað livilíkindini og útbreiðsluna hjá eitt nú svartkjafti vestnafyri Írland og hjá kongafiskinum í Irmingarhavinum.
- Óvanliga lýggja veðrið í Føroyum seinastu árini hevur helst eisini samband við broytingarnar í havinum.
Spátt verður, at upphitingin av sonevnda vakstrarhúsárininum fær pólarnar at bráðna, og hetta kann gera sjógvin so mikið feskan, at hann ikki longur søkkur.
- Tí kann heita rákið fram við Føroyum vikna, og økið kring Føroyar aftur gerast nógv kaldari, heldur Fiskirannsóknarstovan.
