Fótbóltur
Tomislav Sivic, sum ætlandi skuldi venda aftur til Føroya undir hesum kappingarárinum, hevur í seinastuni virkað sum venjari hjá Spartak Subotica í Serbia.
Her hevur tó ikki gingist nakað serligt, og tá Spartak um vikuskiftið tapti 7-1 fyri Borca, var hetta samstundis seinasti dysturin hjá Tomislav Sivic við stýrisvølin.
Kanska var úrslitið í sjálvum sær nóg mikið hjá leiðsluni. Men beinleiðis orsøkin til, at Sivic ikki longur er í felagnum, er, at hvørki hann ella hjálparvenjarar hansara hava fingið løn hendan mánaðin. Hósdagurin í farnu viku varð settur sum evstamark, og tá pengarnir framvegis ikki vóru komnir, møttu hvørki Tomislav ella hinir í venjarahópinum upp mánadagin.
Hetta verður av leiðsluni tulkað soleiðis, at Tomislav sjálvur hevur sagt upp, men hesum noktar venjarin tó fyri. Hann sigur við lokalu fjølmiðlarnar, at treytirnar í sáttmálanum ikki vórðu hildnar, tí leiðslan ikki skil á fíggjarviðurskiftunum hjá felagnum.
- Felagið virðir ikki okkara arbeiði, og nú vilja teir eisini snýta okkum fyri okkara samsýning, sigur Tomislav Sivic, sum nú hóttir við at stevna FC Spartak og stjóranum í felagnum.
