Fimleikafyribrigdið Simone Biles noyðist at bíða eitt sindur longri, áðrenn hon møguliga víðkar um sítt bergtakandi heiðursmerkjasavn.
Í morgun misti hon heiðursmerki í bitakappingini, har hon mátti lata sær lynda við fimta plássið millum teir átta luttakararnar í finaluni.
Undir kappingini datt Biles av bitanum. Tað sama hendi hjá fleiri av kappingarneytunum hjá favorittinum í kappingini.
Biles varð skrivað fyri 13,100 stigatal, jøvn við hitt umboðið úr USA, Sunisu Lee. Fýra kappingarneytar kláraðu seg betur. Best var italska Alice D'Amato við stigatalinum 14.366.
Áður á OL í París vann Biles trý gullheiðursmerki. Við tilsamans sjey OL-gullheiðursmerkjum, trimum øðrum OL-heiðursmerkjum og 30 HM-heiðursmerkjum er hon mest vinnandi fimleikari nakrantíð.
Hon hevur møguleika at hevna sítt vónbrot og økja um heiðursmerkjatalið seinnapartin í dag. Her eru heiðursmerki uppá spæl í gólvvenjingini.
Líka mikið hvussu tann kappingin endar, so hevur Biles gjørt eitt ordans comeback á toppstøðið í ítróttinum, eftir at hon hevði ein langan steðg fyri at røkja sína sálarligu heilsu sína, eftir at hon fekk skrúvisjúku miðskeiðis í OL í Tokyo fyri trimum árum síðani.
/ritzau/
