Jana heldur fast í góðu gongdini í bestu donsku hondbóltsdeildini

Tað bleiv ein sigur og tvey tap til tey trý føroyingaliðini, ið vóru í leiki í bestu donsku hondbóltsdeildini hjá kvinnum í dag. 

Jana Mittún helt fast í góðu gongdini í dag. Lið hennara, Viborg vann á útivølli stórsigur 40-26 (23-14) á Bjerringbro.

Jana fekk fýra málmøguleikar, og hon skoraði upp á allar. Harumframt legði Jana upp til tvey mál.

Pernille Brandenborg og liðfelagarnir í Keypmannahavn høvdu sera torføran útidyst móti verandi meistarunum, Team Esbjerg.

Við einum 31-37 tapi slapp Keypmannahavn nøkulunda við skinninum á nøsuni. Í fyrra hálvleiki var Keypmannahavn væl við, og var Esbjerg bert á odda 18-16 í steðginum. Í seinna hálvleiki dragnaði meira millum liðini.

Pernille sum vanliga er effektiv skoraði eitt mál upp á tríggjar málmøguleikar. Hon vann eisini liðnum eitt brotskast.

Landsliðsmálverjin, Annika Fríðheim Petersen og liðfelagarnir í EH Aalborg taptu tepurt á heimavølli 30-32 fyri gamla liðnum hjá Anniku, Nykøbing Falster. Í steðginum var støðan javnleikur 14-14.

Annika bjargaði tveimum av fýra brotskøstum, ið var framúr. Í vanliga spælinum bjargaði hon níggju av 38 málroyndum.

Í morgin klokkan 13 verður føroyingauppgerð. Tá taka Súna Krossteig Hansen og liðfelagarnir í Skanderborg móti Rakul Wardum og hennara liðfeløgunum í Ringkøbing.

Klokkan 14 hava Maria P. Nólsoy og liðfelagarnir í Horsens torføran heimadyst móti oddaliðnum, Odense.

Støðan: