Óli Olsen, sum er ættaður úr Klaksvík, hevur givið út bókina ”Siglandi arvurin” við undirheitinum "- søgan um føroyskt træskipasmíð”.
Rithøvundurin hevur eitt nú skrivað bókaverkið ”Sigling & útbúgving I og II”.
Nýggja bókin umrøður føroyskt skipatræsmíð frá elstu tíð til okkara dagar. Í bókini vísir hann á, at fyrsta seglskip fer av bakkastokki í Føroyum í 1804, og sagt verður eisini frá Royndini fríðu og øðrum førum, sum vera smíðað í 1800-talinum.
Í bókini sigur høvundurin, at sonevnda motorbátaøldin tekur við eftir 1900, og tá vera nógvir motorbátar smíðaðir. Aftast í bókini er skrá við umleið 250 motorbátum.
Óli Olsen greiðir frá fjølbroyttum skipasmíði fram til 1978, tá seinasta langfaraskipið - Jøkul - fer av bakkastokki.
Parturin í bókini, sum rithøvundurin kallar ”Siglandi mentanararvurin”, umrøður gomlu seglskipini og motorbátarnar, sum enn rógva út.
Framløga verður av bókini í Skúlanum við Ósánna í Klaksvík mikukvøldið 30. oktober, og framløgan byrjar klokkan 19.30.
