Undir viðgerðini av Skálafjarðartunlinum hava fleiri politikarar ført fram, at tað als einki løgið er í, at sáttmálin við CIP er loyniligur.
»Johan Dahl hevur gjørt fleiri sáttmálar við oljufeløg, sum eisini eru loyniligir, og tað ger eingin vrøvl um«, hevur verið sagt – og bæði landsstýrisfólk og løgtingsfólk hava ført hetta fram í kjakinum.
So skuldu vit kanska trúð mýtuni um, at hetta er veruleikin:
– Eingin fær innlit í sáttmálar við oljufeløgini, og so skal eingin hava innlit í sáttmálan, sum Kári P. Højgaard gjørdi við danska felagið hjá gulldreingjunum hjá Dong-stjóranum – sum kanksa funnu onkran hentan idiot í Føroyum, sum teir kundu tjenar sær nógvar pengar uppá.
Ein sum eisini hevur víst á hetta í almenna kjakinum er formaðurin í sambandsfelagnum í Eysturoy, Jóhan Petersen á Glyvrum. Hann hevur funnist harðliga at fjølmiðlafólki og lagt tey undir, at tey ongan fakligan stoltleika hava, tí tey ikki meina tað sama sum hann.
Men tað sum Jóhan Petersen ikki hevur upplýst í almenna kjakinum er, at hann sjálvur hevur biðið – og fingið innlit í sáttmálan millum Vinnumálaráðið og DONG um boring eftir olju í føroyskum sjóøki.
Tað kundi verið áhugavert at vitað, hví privatpersónurin Jóhan Petersen á Glyvrum hevur søkt um alment innlit í hendan sáttmálan. Var tað fyri at kunna prógva, at man fær ikki innlit í ein slíkan sáttmála?
So kundi tað eisini verið áhugavert at vitað, hví Jóhan Petersen ikki hevur sagt frá hesum, nú hann hevur verið so íðin í kjakinum. Tí hann kundi steðgað ósonnu mytunum um, at »man fær heldur ikki innlit í sáttmálar, sum Jóhan Dahl ger við oljufeløgini...«
Tað sum eisini er áhugavert er, at Vágaportalurin hevur søkt og fingið innlit í hendan sama sáttmálan. Tað hevur Vágaportalurin heldur einki skrivað um.
Nú skulu vit ikki siga, hvønn Vágaportalurin rennur ørindi fyri – tann spruningin lata vit liggja hesaferð.
Men púra greitt er, hvønn Jóhan Petersen rennur ørindi fyri.
Sosialurin setti sær í gjár fyri at kanna, um tað ber til at fáa innlit í oljusáttmálarnar ella ikki.
Og tað ber væl til, prógvið hava vit við einum eintaki av sáttmálanum millum Vinnumálaráðið og Dong Energy um loyvi 018 og fylgiskjal 1 og fylgiskjal 2 og loyvi 019 og fylgiskjal 1 og fylgiskjal 2.
