Í dag vita útlendskir miðlar at siga, at størsta sjúkrahús í Gazageiranum, Shifa-sjúkrahúsið í Gazabýi, enn einaferð er rakt av loftálopum.
Eygnavitnir á staðnum siga sambært AP-tíðindastovuni, at fleiri fólk eru deyð og onnur særd í álopunum.
Sjónvarpsrásin, Al Jazeera, hevur sent myndir, sum sagt verður eru frá álopunum i dag, og her liggja fleiri lívleys fólk og sløðast millum bygningarnar á sjúkrahúsøkinum.
Sambært AP vátta tvey fólk, sum hava søkt sær skjól á økinum, at her hava verið loftálop aftur í dag.
- Assad Abu Radwan, sum var vitni til álopið, sigur seg hava talt fimm lík og leggur aftrat, at hann hjálpti øðrum særdum at søkja sær skjól innandura, sigur AP-tíðindastovan.
Tíðindastovan NTB, sum eisini umrøður loftálopið á Shifa-sjúkrahúsið í Gazabýi, sigur, at Ísrael higartil einki hevur sagt um loftálopið í dag.
