SEV bjóðar nú borgarum at framleiða egið el og selja til felagsskapin. Tað boðar felagið frá í tíðindaskrivi í dag.
- Elkundin kann í framtíðini síggja seg sjálvan bæði sum kunda og elframleiðara. SEV hevur slóðað fyri eini nýggjari skipan, har kundin – umframt at keypa elorku frá SEV – eisini kann framleiða elorku inn á elskipanina. Kundin verður sostatt ein “prosumer”, sum hetta hugtakið eitur á enskum. Eitt hóskandi føroyskt heiti er ein “elfelagi” – tað er ein, sum samstarvar við elveitaran um bæði framleiðslu og nýtslu, skrivar felagið í tíðindaskrivi sent fjølmiðlunum fyri løtu síðan.
Upplýst verður, at nýggja skipanin í fyrstu atløgu er ætlað borgarum, ið hava hug at framleiða elorku við sólpanelum, smáum vindmyllum ella smáum vatnorkuverkum, ið hava ein mátt á í mesta lagi 11 kW.
- SEV bjóðar kundunum hendan møguleikan, sum kann spara tí einstaka húsarhaldinum pengar, tí kundin fær høvið at framleiða til egna nýtslu við sólpanelum, eins og hann kann selja elorku inn á netið hjá SEV. Harumframt er kundin við hesi skipanini virkin í orkuskiftinum í Føroyum, sigur Hákun Djurhuus, stjóri í SEV.
Hann vísir á, at gott samstarv og samspæl við kundarnar eru ein týðandi táttur í arbeiðinum at gera Føroyar grønar á landi í 2030.
- Kundarnir verða á henda hátt bodnir við í arbeiðið á grønu kósini, og tað skuldi eisini økt um ognarkensluna í orkuskiftinum at gera Føroyar grønar í 2030. Øll eiga SEV, har vit altíð hava lyft í felag, og vit ynskja eisini, at øll hava hug at fylkjast á grønu kósini, staðfestir Hákun Djurhuus, stjóri í SEV.
Fyri at kunna selja el til SEV er neyðug at hava eitt elverk, sum í mesta lagi hevur ein mátt á 11 kW. Elverkið skal góðkennast av einum góðkendum elinnleggjara, ið vegna borgaran søkir SEV um loyvi at binda verkið í elnetið, og sum samstundis fær til vega eitt framleiðsluloyvi frá Umhvørvisstovuni. Elinnleggjarar avgreiða hesi viðurskifti eftir somu skipan við SEV, sum teir avgreiða allar aðrar íbindingar í elnetið.
SEV upplýsir eisini, at tað ber til at søkja um loyvi at knýta onnur sløg av framleiðslueindum upp í skipanina, sum lúka støddarkrøvini á 11 kW, um hesar framleiðlsueindir annars lúka allar tekniskar treytir. Harumframt ber eisini til at søkja um loyvi til elverk størri enn 11 kW, men tá eru krøvini tey somu sum til stóru elverkini hjá SEV.
Prísir fyri keyp av elorku frá smáverkum
Sólpanel 0,75 kr/kWt uttan MVG íbinding innan fyri málaran (á kunda síðuni)
Vindmyllur 0,35 kr/kWt uttan MVG íbinding uttan fyri málaran (á SEV síðuni)
Vatnturbinur 0,50 kr/kWt uttan MVG íbinding uttan fyri málaran (á SEV síðuni)
