Sev fær nú ein nýggjan deildarstjóra og hann skal hava ábyrgdina av elframleiðsluni burtur av.
Tað boðar Sev frá nú seinnapartin.
Tað er Anders Nedergaard-Hansenm sum nú verður deildarstjóri fyri elframleiðsluni, tað er elverkini, vindmyllulundirnar og annars alt virksemið, sum er knýtt at elframleiðsluni.
Anders Nedergaard-Hansen er í løtuni leiðari á framleiðsludeildini.
Finn Jakobsen, sum í dag røkir starvið sum deildarstjóri fyri tøkni, ið fevnir bæði um framleiðslu og net, verður deildarstjóri fyri elnetinum burturav – t.e. samskipan í kontrolrúminum millum verkini og netið umframt stýrisskipanir, koplingarstøðir, battarískipanir, kaðalføringar, og annað, sum er tongt at netvirkseminum.
Finn Jakobsen heldur eisini fram sum rakstrarleiðari, ið hevur ovastu ábyrgdina av trygdini í streymveitingini. Umframt deildarstjórarnar fyri elnetinum og framleiðsluni er Bogi Bendtsen deildarstjóri fyri fyrisitingini.
- Broytingin hevur í roynd og veru við sær, at netparturin og framleiðsluparturin verða skildir sundur í tvey sjálvstøðug leiðsluøki, sigur Sev.
- Virksemið hjá SEV er nógv økt seinnu árini, og nógvar verkætlanir liggja fyri framman og tí er broytingin sett í verk, sigur Sev.
Sev ætlar, at øll elorkan skal fáast burtur úr varandi orkukeldum í 2030 og eftir íløguætlanini, skal felagið gera íløgur fyri einar tvær milliardir krónur frá í fjør til 2018.
