Hans Tausen Olsen
fyrrv. umboðsráðsformaður í SEV
Sum fyrrverandi umboðsráðsformaður kann eg siga frá, at eg eri so at siga samdur í øllum tí, ið Reidar førir fram.
Eg skal viðmerkja, at í februar 2005 varð nýtt SEV-stýrið valt. Av teimum sjey stýrislimunum valdu fimm Leiv Hansen, f. S.Streymoy til formann, Súna í Hjøllum f. Eysturoynna til næstformann, meðan hinir í meirilutanum vóru Dia Poulsen Suðuroy, Kim Durhuus f. N.Streymoy og Tórur Johannesen f. Sandoy. Meirilutin setti sær høg og alneyðug mál at fremja samb. nýggju viðtøkunum, sum stutt frammanundan ein einmælt umboðsnevnd hevði samtykt.
Farið varð til verka við hesi høvuðsdagsskrá:
SEV skal gerast ein gjøgnumskygdur felagsskapur
Fíggjarætlanin skuldi gerast gjøgnumskygd og skuldi kunna samanberast við roknskapin
Stovna innaneftirlit (sikkerhedskvalitetsstyringssystem samb. tilmæli frá Dansk Energi og krøvunum í Stærkstrømsbekendtgørelsen
4. a) Fíggjarstjóri setast
b) Framleiðslustjóri setast
c) Stjóri fyri býtisvirkini setast
Hesir skuldu hvør á sínum øki hava evstu ábyrgd yvir fyri stýrinum
5. Deild við framtíðarperspektivi sum endamáli skuldi setast
6. Harafturat skuldi setast ein trygdarleiðari samb altjóða reglum, sum hevði beinleiðis tilvísing til stýrið
7. Seta ferð á framtíðar orkuútbyggingar, sum lógu í dvala
8. Fáa skil á starvsviðurskiftum stjórans
9. Fáa skil á fíggjarliga óskilið í Sewave
10. Fremja ein starvsfólkapolitikk, sum samsvarar við nútíðina, har ein starvsfólkaleiðari fekk ábyrgdina
Hesi høvuðspunkt vórðu sett fyri at fáa felagsskapin dynamiskan, nútímans og ikki minst fyri at vinna álit aftur millum landsins politikarar og landsins borgarar, sum eiga SEV.
Hesin fyrr nevndi stýrismeiriluti fekk bert 1 ára arbeiðsfrið, men longu tá vóru øll hesi fyrr nevndu punkt komin undir land og vóru bara eftir at seta í verk. Men her kom trupulleikin. Stjórin saman við minnilutanum og hansara aliansa arbeiddi alt tað, teir vóru mentir at forða meirilutanum at fremja sína søk. Við øllum óhugsandi frekleikum, ósannindum og tápiligheit varð roynt at sabotera einhvørjari skilagóðari loysn.
Meirilutin kom tí til ta niðurstøðu, at uppsiga SEV-stjóran, tí álitið á hann var fokið og ikki metti, at samstarvið kundi halda fram. Meirilutin koyrdi stjóran til hús, tí mett var, at hann ikki var rætti maðurin at standa á odda fyri SEV í samband við tær avbjóðingar sum SEV hevði í framtíðini – tá ið hugsað verður tekniskt, fíggjarligt, umsitingarliga og ikki minst opinleika yvir fyri stýrinum.
Sum umboðsnevndarformaður var eg púra samdur við meirilutanum!
Endin var, at Leivur Hansen leyp frá. Var politiskt ryggleysur og gekk brádliga í alliansu við sínar argastu mótstøðumenn. Hann kúvendi so nógv og óskiljandi, at hann saman við hesum monnum fór loyniliga kring Føroya land við ósannindum at fáa tann demokratiskt valda meirilutan burturbeindan. – Uttan yvirhøvur at seta seg inn í málið ella tosa um trupulleikarnar í SEV eydnaðist honum við einum sera teprum meiriluta at bumba SEV aftur í Sovjettíðina, har “páfuglarnir” og ovasta leiðslan tignarliga kunnu standa á einum palli og heilsa borgaranum um eitt tempul, sum ongin fær loyvi at kaga inní.
Stjórin varð settur aftur í starv, hóast stýrið visti; at hann hevur næstan helmingin av umboðsnevndini ímóti sær. Fyri mær er eingin ivi um, at ein stjóri, sum bara hevur ein stóran minniluta ímóti sær eigur at leggja frá sær, og uppaftur meira, tá hann hevur havt ein meiriluta av stýrinum ímóti sær.
Hetta kvettið í SEV man vera eindømi í einum sokallaðum demokratiskum landi!
Eftir at meirilutin var burturbeindur, valdi eg sum umboðsnevndarformaður at trekkja meg tí týðuliga sást, at ikki var pláss fyri øðrum meiningum.
Persónliga skilti eg ongantíð, at nakar gekk við til at stilla upp - og enntá lata seg velja so ódemokratiskt, bara fyri at verja einaveldi SEV-stjórans.
Stutt sagt eri eg samdur við øllum teimum mongu og nú Reidar Nónfjall um, at alneyðugt verður at skifta út meginpartin av dagligu leiðsluni í SEV.
Men hvar eru fjølmiðlarnir? Hava teir ikki eina stóra ábyrgd at røkja í hesum føri?
Runavík, tann 14. mai 2007
