24. til 30. mai fer Fólkaheilsuráðið at skipa fyri einari viku, har fólk fara at seta bilin og ganga - maira og títtari.
Útivikan 2009 fekk sera stóra undirtøku. Arbeiðspláss, stovnar, kommunur, miðlar, ja, stórt sæð øll tóku undir við henni og gjørdu nógv burturúr. Útivikan byrjar mánadag 24. mai. Týsdagur 25. mai er fyrsti summardagur, so passandi kunnu vit siga, at summarið byrjar við Útivikuni, sigur Fólkaheilsuráðið í tíðindaskrivi.
- Øll kenna fyrimunirnar av at seta bilin og at ganga og harvið røra seg. Betri heilsa, betri lag og fyri fyritøkur: glaðari starvsfólk og færri sjúkradagar. Hetta er ein liður í at gera tað lættari hjá fólki at velja bilin frá. Um onnur gera tað, so kunnu vit eisini. Tað, at øll seta fokus á rørslu samstundis, ger tað lættari hjá tí einstaka at taka stigið ? og ganga, sigur Fólkaheilsuráðið.
Ætlain er, at øll skulu vera við í hesum tiltaki: Tey, ið hava stutt til arbeiðis, tey, ið hava langt til arbeiðis og eisini tey, ið koma av bygd, kunnu annaðhvørt taka bussin ella seta bilin langt frá arbeiðsplássinum og síðani ganga.
- Um hetta tiltakið skal eydnast, mugu allar fyritøkur í Føroyum luttaka og royna at eggja sínum starvsfólki til at seta bilin og heldur fara til gongu. Hetta kann gerast hvør sær, men eisini hevði verið stuttligt um fyritøkan í felag við starvsfólki skipaði fyri kappingum, útferðum ella onkrum heilt øðrum - tit avgera púra sjálvi, hvussu tit leggja útivikuna til rættis. Fólkaheilsuráðið hevur sent teldupost til nógv arbeiðispláss, har heitt verður á leiðslur og starvsfólk um at taka undir við hesum tiltaki.
