Semingsstovnurin fer nú undir eina nýggja roynd at fáa semju millum Føroya Pedagogfelag og almennu arbeiðsgevararnar, ið eru Kommunala Arbeiðsgevarafelagið og Lønardeildin hjá Fíggjarmálaráðnum. Tað upplýsir Terje Sigurðsson, semingsmaður.
- Vit hava avgjørt at taka samráðingarnar upp aftur hósdagin tann 28. desember, sigur Terje Sigurðsson, í eini fráboðan, ið uttan iva er ein góð jólagáva hjá mongum føroyingum, nú tíggju dagar eru liðin síðan fyrstu tiltøkini í stríðnum millum partarnar blivu sett í verk.
Semingsstovnurin gav skarvin yvir, tá báðir partar 9. desember vrakaðu seinastu semingsroyndina, tí mett varð, at partarnir vóru ov langt frá hvørjum øðrum. Hóast Semingsstovnurin aftur kemur upp í leikin, skal tað tó ikki skiljast soleiðis, at partarnar hava slakað í sínum krøvum.
- Fundurin er komin í lag, tí báðir partar vita, at tað er neyðugt at seta seg saman fyri at finna eina loysn. Tað er ikki soleiðis, at vit hava fingið nøkur tekin um, at partarnar slaka í sínum krøvum. Hetta er ein ásannan av, at tað er neyðugt at seta seg saman at tosa um tingini. Man vil geva tí eina roynd, sigur Terje Sigurðsson.
Í samband við at samráðingarnar nú verða tiknar upp aftur, hevur Semingsstovnurin heitt á partarnar, um at royna at fáa viðurskiftini á arbeiðsmarknaðinum at fungera so smidliga sum gjørligt á jólum.
