Í morgin skifta Sernámsdepilin og NSR tænasturnar navn til Sernám Sernám er stovnur undir Mentamálaráðnum, sum veitir sernámsfrøðiliga ráðgeving, vegleiðing og stuðul, soleiðis at børn og ung kunnu styrkjast í menningini, sum umfatar sosiala, kropsliga, persónliga, málsliga og kognitiva menning.
Navnið Sernám tekur støði í tí, sum stovnurin ger, - at veita sernámsfrøðiliga og sálarfrøðiliga ráðgeving.
Samstundis fær stovnurin nýtt búmerki og nýggja heimasíðu.
Búmerkið tekur støði í kúvinga- ella sniglahúsanum.
Spiralurin í kúvinginum kann tulkast sum tilvera, tilgongd og menning. Sniglahúsin ímyndar javnvágina millum tað innara og tað uttara. Tað harða og tað bleyta. Verjuna og tað sárbara.
Spiralurin er teknaður í punktformi, sum kann síggjast sum stig á leiðini í einari tilgongd ávegis móti einum endaligum formi.
Formarnir eru ójavnir og virka soleiðis menniskjansligir og kanska barnsligir. Lyklaorðini eru: Leikur, gleði, dynamikkur og menning.
Sansir hava ráðgivið um navnið, sniðgivið búmerkið og heimasíðuna. Heimasíðan er bygd á heimasíðuskipanina Sansir.Net.
Vilt tú vita meira um Sernám, kanst tú vitja heimasíðuna www. sernam.fo.
Nýggi teldubústaðurin er sernam@sernam.fo
