Í tveimum førum stillar Zakarias Wang mær spurningin, hvat eg hevði hildið um úrslitið á fólkaatkvøðuni í 1946, um tað var eitt annað, enn tað veruliga var:
Um loysingin fekk 49,3% og stórnaruppskotið 50,7% (veruliga úrslitið var 47,2% fyri stjórnaruppskotinum, 48,7% fyri loysingini, 4,1% vóru ógildugar atkvøður og valluttøkan var 66,4%) ella
Um loysingin fekk 5.499 atkvøður og stjórnaruppskotið 5.660 atkvøður (veruliga úrslitið var 5.499 atkvøður fyri stjórnaruppskotinum, 5.660 atkvøður fyri loysingini, 478 atkvøður vóru ógildugar, 11.637 vóru á vali og vælrætt høvdu 17.216)
Í báðum førum ”gloymir” ZW (við vilja?) ógildugu atkvøðurnar. Hetta broytir jú spurningin, soleiðis, at verða hesar atkvøður, sum í ein stóran mun helst hava verið “nei”-atkvøður eftir áheitan frá formanni Fólkafloksins Thorstein Petersen, tiknar við, sum rímuligt er, verða prosentini ávikavist 47,2 og 48,7 og soleiðis fær hvørki av uppskotunum fleirtal.
Verða ógildugu atkvøðurnar ikki tiknar við, verður talan um eitt evarska lítið simpult fleirtal og eitt stórt simpult ikki-fleirtal. Men talan skuldi sambært Th. Petersen ikki verða um simpult, men kvalifiserað fleirtal (helvt av øllum atkvøðum).
Tí broytir spurningurin hjá ZW onki upp á úrslitið og heldur ikki upp á svarið, hóast hann ikki virðir ógildugu atkvøðurnar og um hann so vendir øllum á høvdið og letur stjórnaruppskotið fáa fleiri atkvøður enn loysingin, tí
Th. Petersen hevði lovað, at ”nei”-atkvøðurnar skuldu telja við, enntá sum gildugar,
Th. Petersen kravdi kvalifiserað fleirtal,
bæði Th. Petersen og Andras Samuelsen, formaður Sambandsfloksins, søgdu undan fólkaatkvøðuna, at fólkaatkvøðan skuldi vera vegleiðandi,
allir flokkar, eisini Fólkaflokkurin, góðtóku, at danska stjórnin sendi tingið heim og útskrivaði nýval. Bert ein ekskluderaður javnaðartingmaður góðtók ikki hetta.
