Hvussu ber tað til, at jarðskjálvtin, sum bleiv máldur til 8,7 á Richter-talvuni, ikki elvdi til eina flóðaldu?
Tað er spurningurin, sum altjóða viðurkendir flóðalduserfrøðingar seta sær sjálvum og hvør øðrum í hesum døgum, tí teir ivaðust ikki í, at skjálvtin sein-asta mánadag fór at elva til eina næstan líka stóra flóðaldu sum hana annan jóladag.
- Tað undrar meg stórliga, at ein so harður jarðskjálvti ikki elvdi til eina flóðaldu nærhendis miðdeplinum, sigur jarðfrøðingurin og flóðalduserfrøðingurin Robert Cessaro á amerikanska ávaringarstovninum Pacific Tsunami Warning Center á Hawaii-oyggjunum við tíðindastovuna AP.
Stjórin á stovninum, Charles McCreery, sigur, at ein jarðskjálvti, sum er harðari enn 8,0 á Richter-talvuni, elvir vanliga til eina rættiliga stóra flóðaldu, og at hann og hansara fólk væntaðu eina rættiliga stóra flóðaldu mánadagin. Tí ávaraði støðin á Hawaii-oyggjunum londini við Indiska Havið um, at ein flóðalda kundi vera á veg.
Charles McCreery sigur við AP, at tilburðurin mánadagin vísir, at enn kann vísindin ikki siga við vissu, nær ein jarðskjálvti undir havbotninum kann elva til eina flóðaldu.
