Boris Tadic, forseti, fekk í gjárkvøldið høvi til at siga limalondunum í ST-trygdarráðnum, hvat hann og serbiska fólkið halda um avgerðina hjá meirilutanum í Kosovo at loysa landspartin frá Serbia.
- Serbia fer ongantíð at viðurkenna eitt sjálvstøðugt Kosovo. Vit fara ikki at lata Kosovo frá okkum, og vit gevast ikki, fyrr enn vit hava fingið okkara rættindi, segði Boris Tadic í ST-trygdarráðnum.
Hann kundi frøast um, at tað er ósemja í trygdarráðnum um Kosovo. USA, Bretland og Frakland taka undir við sjálvsstýrislýsingini, meðan Russland og Kina siga kortanei. Serbia vil hava trygdarráðið at lýsa loysingina ógylduga, men tað vil trygdarráðið ikki.
USA viðurkendi í gjár Kosovo, og í gjárkvøldið kunngjørdi serbiska stjórnin, at hon hevði givið sínum sendiharra í Washington boð um at koma heim. Vojislav Kostunica, forsætisráðharri, segði, at sendiharrarnir í londum, sum viðurkenna Kosovo, fáa somu boð sum sendiharrin í USA.
Serbiska tjóðartingið samtykti í gjárkvøldið at ógilda avgerðina hjá kosovoalbanska meirilutanum at loysa. Við 225 av teimum 250 atkvøðunum samtykti tingið, at yvirlýsingin úr Pristina er í stríð við serbisku grundlógina og brot á landsins fullveldi. Samstundis varð gjørt greitt, at Serbia tryggjar sær rætt til at draga teir kosovoalbansku leiðararnar fyri rættin fyri at hava brotið serbisku grundlógina.
