Gjáramorgunin fekk løgreglan fleiri fráboðanir um hálku á ymiskum vegastrekkjum kring landið.
Soleiðis komu fráboðanir eitt nú úr høvuðsstaðarøkinum og úr Suðuroy, har tað var serliga hált inni í bygdum og býum.
Í gjár var tað serliga ísur í støðum, sum órógvaði bilførarar, tó at frostið var burtur, og vit aftur høvdu nøkur hitastig í luftini.
Aftur í morgun hevur løgreglan fingið fleiri fráboðanir um hálku, men nú er tað aftur frostið, sum elvir til høvuðbrýggj.
Frost hevur í morgun verið á fleiri vegastrekkjum kring landið, og í morgun hava fráboðaninar serliga snúð seg um svarthálku.
- Fólk hava ringt og sagt frá hálku og starvsfelagar, sum eru møttir til arbeiðis her í morgun, siga tað sama, sigur vaktleiðarin.
Tað hevur verið sera hált fleiri staðni kring landið, men tíbetur hevur ferðslan eftir øllum at døma gingið væl.
Á løgreglustøðini í Havn hava tey higartil í morgun ongar fráboðanir fingið um óhapp ella stórvegis trupulleikar í ferðsluni.
- Hetta hevur eisini verið ein stak friðarlig nátt. Onkur sjúkraflutningur hevur verið. Annars hevur alt gingið væl, verður lagt aftrat.
