Flogskiparafelag Føroya boðar í kvøld frá, at limir felagsins í uratkvøðugreiðslu hava samtykt at góðtaka semingsuppskotið, sum varð lagt fyri partarnar fríggjadagin.
Hesum boðar felagið frá í tíðindaskrivi. Felagið skrivar soleiðis:
Flogskiparafelag Føroya og Føroya Arbeiðsgevarafelag vegna Atlantic Airways funnið semju um tvey ára sáttmála.
Tann 27. apríl boðaði nevndin í Flogskiparafelag Føroya Semingsstovinum frá, at seinna semingsuppskotið, sum var handað nevndini tann 20. apríl, var ov langt frá tí, sum kundi góðtakast av Flogskiparafelag Føroya og tí ikki var nóg búgvið at leggja fyri limirnar til støðutakan.
Sama dag funnu umboð fyri Flogskiparafelagið og Atlantic Airways saman í beinleiðis samráðingum millum partarnar í eini roynd at finna semju um týdningarmestu broytingarnar, sum Flogskiparafelagið ynskti at fáa við í sáttmálan. Henda tilgongd var konstruktiv frá báðum pørtum, og við teimum týðandi broytingunum, sum vóru framdar, bar á mál.
Uppskotið við hesum broytingunum hevur í dag verið til uratkvøðu hjá limunum, og ein stórur meiriluti atkvøddi fyri broytta uppskotinum. Flogskiparafelag Føroya fegnast samstundis um, at Lock-Out støðan, sum Føroya Arbeiðsgevarafelag valdi at seta í verk, ikki verður neyðug hóast alt.
Nevndin í Flogskiparafelag Føroya
