Bretsku skurðlæknarnir vilja vera við, at gøgnini verða tikin og seld uttan tilsøgn frá fangunum ella teirra avvarðandi. Skurðlæknin Stephen Wigmore sigur við BBC, at ofta verða gøgnini seld so skjótt, at leiðslurnar í fongslunum mugu hava valt tann rætta fangan burturúr longu frammanundan.
Fleiri mannarættindafelagsskapir hava leingi lagt Kina undir at taka gøgn úr avrættaðum fangum við sølu fyri eyga, og bretska skurðlæknafelagið er heldur ikki í iva um, at kinesiska framferðin er í stríð við altjóða mannarættindini. Sambært Stephen Wigmore eru prógvini sum umfatandi, at okkurt má gerast við málið.
Kinesisku myndugleikarnir avsanna, at teir taka gøgn úr fangum fyri at fáa pengar vinning burtur úr teimum, og í síðsta mánað kunngjørdi stjórnin í Beijing, at hon hevði gjørt av at steðga øllum handli við gøgnum.
Stephen Wigmore sigur við BBC, at kinesiski handilin við gøgnum er vorðin ein liður í landsins ferðamannavinnu. Á hvørjum ári fara fólk úr Vesturheiminum, Japan og Suðurkorea til Kina at ferðast, tí har kunnu tey samstundis fáa nýggj gøgn, sigur hann.
