Sea Shepherd hevur aftur sett kós ímóti Føroyum.
Seinastu dagarnar hava tvey skip hjá Sea Shepherd, Sam Simon og Bob Barker verið í Lerwick í Hetlandi og bunkra.
Og í gjár loystu tey aftur og settu kós ímóti Føroyum. Veðrið var ikki til tilvildar, so tey lógu og krokaðu undir Hetlandi til í gjárkvøldið, men eru tey á veg hendavegin, upplýsir felagsskapurin.
Tað er eisini skilligt, at tað kom rættiliga óvart á tey í Sea Shepherd, at løgreglan í Lerwick legði hald á skjóttgangandi bátin, Echo. Tað var eftir áheitan frá løgregluni í Føroyum, at hald varð lagt á bátin, tí hann varð brúktur at seta lív og heilsu í vanda í grindadrápinum í Sandavági.
- Vit høvdu ikki vænta, at løgreglan í Føroyum rakk heilt til Hetlands eftir okkum, sigur felagsskapinum.
Síðani hevur damnska verjuskipið, Knud Rasmussen, verið í Lerwick eftir bátinum.
Hetlendingar siga, at danska verjuskipið gjørdi skjótt av, tí skipið steðgaði ikki meiri enn ein hálvan tíma í Lerwick.
Tey siga, at tey tá ið tey frættu, at tá ið hald varð lagt á bátin, varð málið lagt fyri rættin við kravi um, at hald skuldi ikki leggjast á hann. Tey siga, at tey fingu viðhald í rættinum, men tá hevði Knud Rasmussen longu verið eftir honum.
Tey eru so ónøgd við framferðina hjá løgregluni í Hetlandi, at tey kanna møguleikarnar fyri at stevna fyri at hava lagt hald á bátin ólógliga.
Samstundis ger oddamaðurin í Sea Shepherd, Paul Watson greitt, at tað verður neyðugt hjá felagsskapinum at herða stríðið ímóti grindadrápi í Føroyum.
Hann ger eisini greitt, at Sea Shepherd fer aldrin at gevast í stríðnum og at tað fer at halda á, sama, hvussu nógv fólk hjá felagsskapinum verða víst av landinum, og sama hvussu nógvir bátar, hald verður lagt á.
