Samveldiskanslarin í Tysklandi, Olaf Scholz, ætlar at økja um talið av útvísingum og minka um ólógligu tilflytingina til landið.
Tað sigur hann í dag á vitjan í týska býnum Solingen, har trý fólk vórðu dripin í einum kníválopi fríggjakvøldið.
- Tað var yvirgangur. Yvirgangur ímóti okkum øllum, sigur Scholz eftir at hava lagt blómur á staðið, har álopið fór fram.
Týska ákæruvaldið heldur, at ein limur í Islamskum Stati (IS) úr Sýria framdi álopið.
Politiskur spenningur er vaksin í Týsklandi orsakað av álopinum, og kjak hevur verið um friðskjól- og útflytingarreglur undan trimum deilsstatsvalum í næsta mánaði.
- Vit mugu gera alt, sum vit kunnu, fyri at tryggja, at tey, sum ikki sleppa at vera verandi í Týsklandi, verða send heim og útvíst, sigur Scholz.
Hann vísir til mistonkta gerningsmannin sum "eitt Dublin-mál".
Við hesum vísir hann á ES-reglur, sum byggja á, at friðskjólsøkjarar skulu lata umsóknina inn í fyrsta ES-landinum, teir koma til.
Myndugleikarnir ætlaðu at burturflyta ákærda í álopinum fríggjadagin til Bulgaria í fjør, siga týskir miðlar.
Álopið hendi í býarveitslu í Solingen fríggjadagin. Trý lótu lív og átta fólk fingu skaða.
Fýra av teimum særdu, sum í fyrstu atløgu vóru álvarsliga særd, eru ikki í lívsvanda longur, varð upplýst í gjár.
Solingen liggur í statinum Norðurrín-Westfalia í vesturtýsklandi, tætt við Düsseldorf og Köln.
Sambært tíðindastovuni Reuters er ákærdi eyðmerktur sum Issa Al H.
Týska ákæruvaldið hevur ikki upplýst eftirnavnið á ákærda.
IS tók ábyrgdina av álopinum í eini fráboðan á boðtænastuni Telegram.
/ritzau/Reuters
