Fornminnissavnið, Náttúrugripasavnið, Sjósavnið og Listasavnið hava opið fyri børnum, ungum og vaksnum mánadagin 10. til og við fríggjadagin 14. oktober kl. 11-16.
Skipað er fyri ymiskum tiltøkum og framsýningunum. Uppgávur og aktivitetir vera til børn, og tey vaksnu kunnu hjálpa til, hyggja seg um ella fáa sær ein kaffimunn, meðan børnini eru aktiv.
Sum nakað nýtt verður í ár møguligt hjá børnunum at ogna sær eina savnsbók. Savnsbókin er eitt ringbind í A5 stødd, og tað kostar kr. 20,-. Tað kemur í staðin fyri uppgávuheftini, sum børnini kenna frá árunum frammanundan. Hesa ferð er ætlanin, at allar uppgávur eru á leysum A5 ørkum. Børnini avgera sjálvi, hvørjar uppgávur skulu við í bókina, og sama bókin kann nýtast á øllum søvnunum. Savnsbókin kann eisini nýtast aftan á Savnsfagnaðin, tí ætlanin er framhaldandi at framleiða tilfar at seta í hana restina av árinum. Eisini kemur alt tilfarið at finnast í pdf formati og liggja á heimasíðunum hjá søvnunum og á www.snar.fo
Í heystfrítíðini lata søvnini hvønn dag upp kl. 11 og hava opið til kl. 16. Meðan opið er, er møguligt at síggja og hoyra ymiskt forvitnisligt. Evnið kostur verður sjálvandi lýst, men eisini koma serfrøðingar at vera á søvnunum við forvitnisligum tilfari og kunnu svara spurningum frá vitjandi. Søvnini hava eisini vísindafólk, ið hvønn dag fara at greiða frá, hvørjum tey arbeiða við.
Meira kann lesast um skránna til Savnsfagnaðin á www.pressan.fo
