Almennar saudiarabiskar keldur siga nú, at meiri enn 1.000 saudiarabiskir stjórnarhermenn eru farnir um markið til Bahrain. Orsøkin er, at í Bahrain hava mótmælisfólk skipað fyri tiltøkum tann seinasta mánaðin við kravi um politiskar nýskipanir.
Andstøðan í Bahrain er sera misnøgd við saudiarabisku uppílegingina, og andstøðuleiðararnir siga, at talan er um krígsavbjóðing og herseting.
Sunnimuslimarnir hava valdið í Bahrain, hóast teir eru í minniluta, tí meginparturin av fólkinum eru shiamuslimar. Meginparturin av fólkinum í Saudiarabia eru sunnimuslimar.
Tíðindini um teir saudiarabisku hermenninar í Bahrain fekk seinnapartin oljuprísin at hækka meiri enn tveir dollarar fyri tunnuna.
