Um vikuskiftið tók Torkil Veyhe eitt óvæntað annað pláss í eini súkklukapping á Bornholm. Hann luttekur í hesum døgum í Post Cuppen, og tað vóru fáir, ið mettu, at hann skuldi klára at halda seg fram at í hesi kappingini.
Kortini setti hann av álvara sín dám á kappingina, og sambært donskum miðlum var hann oddamaður fyri øllum, sum hendi, og tað var ikki fyrr enn í endaspurtinum, at Troels Vinther snýkti seg fram um.
Torkil Veyhe er tó væl nøgdur við annað plássið.
- Tað var sera óvæntað. Eg havi koyrt væl seinastu vikurnar og fingið nøkur góð úrslit, so eg vónaði, at eg fór at klára meg væl, sigur Torkil Veyhe við feltet.dk.
- Eg helt, at eg koyrdi sera væl líka frá byrjan og var við í tí mesta, sum hendi. Eg haldi, at eg hevði góð bein, og eg hevði nógv yvirskot allan dagin. Tað gav í øllum førum úrslit í dag, sigur Torkil Veyhe, sum satsar nógv upp á DM í einkultstarti, sum verður um knappar tríggjar vikur.
