Hóast flokkurin misti sjey prosentstig av sínum atkvøðum frá seinasta vali, og hon persónliga fekk 2.469 atkvøður færri enn til síðsta val, so gjørdist Sara Olsvig, forkvinna í IA, toppskorari í grønlendska valinum í gjár. Forkvinnan í IA fekk 3.360 persónligar atkvøður, ið er 650 atkvøður fleiri enn næsti maður á listanum.
Næsti maður á listanum er Niels Thomsen, ið er nýggja stjørnuskotið hjá Demokraterne. Við 2.710 atkvøðum gjørdi hann ein veruliga vørr sjey ár eftir, at hann boðaði frá, at hann gavst í grønlendskum politikki fyri at hugsavna seg um eina yrkisleið innan vinnulívið. Veljararnir hjá Demokraterne tykjast at vera glaðir fyri at hava fingið hann aftur, tí hann fekk heili 1.836 atkvøður fleiri enn Nivi Olsen, ið er næstvald hjá flokkinum.
Á triðja plássi er fyrrverandi landsstýrisformaðurin Hans Enoksen, ið fekk 2.531 atkvøður á valinum. Flokkurin hjá honum, Partii Naleraq, gjørdist fjórðistørsti flokkur á valinum við 13,4 prosent av atkvøðunum. Hans Enoksen fekk 2.531 av teimum 3.931 atkvøðunum, ið flokkurin fekk á valinum.
Sitandi landsstýrisformaðurin og formaður í Siumut, Kim Kielsen, er nummar fýra á listanum yvir flestar atkvøður við 2.165 persónligum atkvøðum. Talan er tó um eina stóru afturgongd í persónligum atkvøðum, tí til valið fyri fýra árum síðan fekk landsstýrisformaðurin 4.608 atkvøður. Tað er ein minking á 2.443 atkvøður.
